“Сайыҥҥы лааҕыр дистанционнай ньыманан барар” диэни истэн төрөппүттэр, оҕолор буолуоҕунааҕар, бу эйгэҕэ сыһыаннаах даҕаны дьон мунаарара үгүс. СӨ Үөрэҕин уонна наукатын миниистирэ Михаил Сивцев социальнай ситимнэринэн быһа сибээс кэмигэр лааҕыр туһунан ыйытыыга хоруйдаата.
Оҕо сайыҥҥы сынньалаҥын уонна доруобуйатын бөҕөргөтүү эбии үөрэхтээһин буолбатаҕын чопчулаата. Итиэннэ коронавируһунан сибээстээн, лааҕыр үлэтэ от ыйын 15 күнүттэн саҕаланыаҕа диэн миниистир иһитиннэрдэ. Араас хайысхалаах (дифференцированнай) көрүҥү туһанар былааннаахтарын ыйда.
Билигин, ордук Дьокуускай куоракка оҕо сынньалаҥын, доруобуйатын бөҕөргөтүүнү үгэс быһыытынан ыытар кыахпыт суох, ол иһин судаарыстыбаннай тэрилтэлэри кытта дистанционнай ньыманан ыытыы араас көрүҥнэрин тобулабыт, үлэлэһэбит диэн эттэ.
“Ыраах нэһилиэктэртэн ураты дистанционнай ньыманы бастакы сезоҥҥа, бэс ыйыгар тэрийэргэ сананабыт. От ыйыгар балаһыанньа тупсуо диэн этэр кыахпыт суох. Онон иккис уонна үһүс сезоннары оччолорго өрөспүүбүлүкэҕэ, нэһилиэктэргэ балаһыанньа хайдаҕыттан көрүөхпүт. Сайын түмүктэниэр диэри үгэс быһыытынан олохсуйбут ньыманан оҕо лааҕырдарыгар толору сынньаныахтара диэн эрэнэбит”, — диэн быһаарда.
Итиэннэ быйыл аһылларга бэлэмнэммит, ол эрээри коронавирус мэһэйдээбит оҕо сынньалаҥын тэрийэр 651 тэрилтэттэн 75 бырыһыана санитарнай-эпидемиологическай түмүк ылаары докумуонун Роспортебнадзорга биэрбитин эттэ.
Онон балаһыанньа тубустаҕына оҕолор лааҕырга сынньанар кыахтаналлар.
Людмила ПОПОВА, “Саха сирэ” хаһыат, edersaas.ru
Хаартыска: Якутия24