Үөрэх миниистирэ оскуолаларга сылаас аһылыгы тэрийии хайдаҕын бэрэбиэркэлээтэ
Миниистир Сивцев бүгүн Дьокуускай куорат 3 №-дээх оскуолатыгар сылдьан, алын кылаас оҕолоро сылаас аһылыгынан хайдах хааччыллалларын көрдө. Бу туһунан министиэристибэ пресс-сулууспата иһитиннэрдэ.
Санатар буоллахха, өссө балаҕан ыйын саҥатыгар төрөппүттэри кытары көрсүһүү буолбута. Ол түмүгүнэн, оҕолор аһылыктарын менютун СӨ Роспотребнадзор управлениетын, төрөппүт кэмитиэтин кытары сөбүлэһии хайаан да наадатын уонна бракераж хамыыһыйатыгар (ас амтанын, бүлүүдэ тас көстүүтүн сыаналыырга) төрөппүт кэмитиэтиттэн бэрэстэбиитэл киллэрэр туһунан этиллибитэ.
—Бу этиилэр, туруорсуулар учуоттаналлар. Ол курдук, бракеражнай хамыыһыйаҕа уопсайа 486 төрөппүт киллэрилиннэ. Ый бүтүөр диэри оҕолор уонна төрөппүттэр анкета толороллор. Ол кэнниттэн, төрөппүттэри кытары өссө төгүл көрсүөхтээхпит. Анкеталары түмэн анаалыстыахпыт, ол кэнниттэн «Бүтүн Арассыыйатааҕы норуот фронун», төрөппүттэр кэмитиэттэрин кытта бииргэ сылаас аһылыгы тупсарыыны тэрийии туһунан өссө төгүл быһаарыылары оҥоруохпут, — диэтэ миниистир.
Дьокуускай куорат 3 №-дээх оскуолатын дириэктэрэ Яна Киуру 24 күннээх аһылык менюта ирдэбилгэ эппиэттиирин итиэннэ СӨ Роспотребнадзор управлениетын кытары сөбүлэһиннэриллибитин бэлиэтээтэ.—Хас күн аайы сылаас иҥэмтиэлээх, битэмииннээх аһылыгынан, салаатынан хааччыллаллар, арыт фрукта бэрилл. Бэлэмниир астарын бракеражнай хамыыһыйа бэрэбиэркэлиир. Маны сэргэ, төрөппүт оҕолор тугу аһыылларын инстаграмынан киирэн көрөр кыахтаах, — диэтэ дириэктэр.
+1
+1
+1
+1
+1
+1
+1