СӨ Үөрэҕин уонна билимин миниистирэ Ирина Любимова пресс-кэмпириэнсийэҕэ иһитиннэрбитинэн, быйыл 8513 киһи биир кэлим эксээмэни, 11 457 оҕо сүрүн судаарыстыбаннай эксээмэни туттарар.
Миниистир быйылгы бүтүн Арассыыйатааҕы бэрэбиэркэлиир үлэ аны күһүҥҥэ көспүтүн санатта.
Бастатан туран, учууталлар оҕолору эксээмэҥҥэ күүскэ бэлмнииллэригэр ураты болҕомтону ууралларын, дьаҥ намтаан, иккис ыйын оҕолор олоҕурбут көрүҥүнэн үөрэнэллэрин иһитиннэрдэ.
Иккиһинэн, оҕолору уйулҕа өттүнэн бэлэмниир ирдэнэрин, ити туһунан төрөппүттэргэ эмиэ эппитин ыйда. “Оҕолор үөрэх бырагырааматын билэр да буоллахтарына син биир долгуйаллар. 9-с кылаас кэнниттэн дьаҥынан сибээстээн сүрүн судаарыстыбаннай эксээмэни туттарбатах оҕолор быйыл биир кэлим эксээмэни туттараллар. Онон оҕолор долгуйалларын өйдүүбүн, бланканы толорон, видео каамеранан эксээмэн туттаран көрбөтөхтөрө. Итиэннэ 11 сыл тухары толору үөрэх саҥа ыстандаартынан (ФГОС) үөрэммит оҕолор туттараллар. Онон матырыйааллара (КИМ) букатын атын, былырыыҥҥы курдук буолбатах. Быйылгы эксээмэн өссө биир уратыта ити буолар”, — диэн миниистир быһаарда.
Тохсус кылаас кэнниттэн эксээмэни туттарааччыларга эмиэ уларыйыылар баалларын иһитиннэрдэ. Ол курдук, 11-с кылаастарга курдук усулуобуйалаах барарын, матырыйаалы (КИМ) аудиторияларга миэстэтигэр бэчээттииллэрин, барыта видеонан көрүллэрин, матырыйаалы эмиэ куйаар ситиминэн ыыталларын, оскуолалар маныаха бэлэмнэрин эттэ.
Тохсус кылаастарга эксээмэҥҥэ киириигэ көҥүл быһыытынан түмүктүүр сэһэргэһии (итоговое собеседование) буолан ааспыта, манна 541 оскуола, 12 тыһ. тахса оҕо кыттыбыт, үөрэнээччи 99,6 бырыһыана “зачет” ылбыт. Миниистир бу үчүгэй көрдөрүү буоларын ыйда. Атыттар убаастанар төрүөтүнэн туттарбатахтар, кинилэр эбии түһүмэххэ – ыам ыйын 16 күнүгэр ааһыахтарын сөп. Быйыл 9-с кылаас кэнниттэн 11 457 оҕо сүрүн судаарыстыбаннай эксээмэни туттарыаҕа.
11-с кылаас кэнниттэн 8513 киһи биир кэлим эксээмэни туттарарга сайабылыанньа биэрбит, итинтэн — 7920 быйыл оскуоланы бүтэрээччи. Уопсайа, 230 биир кэлим эксээмэни ыытар пууну бэлэмнээбиттэриттэн, 10 пуун – оһуобай (3 холуонньаҕа, 7 дьиэҕэ).
Санатан эттэххэ, Саха сирэ эксээмэни ыытыыга кэлиҥҥи үс-түөрт сылга дойду үрдүнэн күөх зонаҕа сылдьар. Бу эксээмэни чиэһинэйдик ыытыыны туоһулуур.
Людмила ПОПОВА, “Саха сирэ” хаһыат, edersaas.ru
Хаартыска: СИА