Кыайыы Үөрэх уонна наука

Үөрэх үлэһиттэрэ Кыайыы күнүн 9 км сүүрэн көрүстүлэр

СӨ үөрэҕин уонна наукатын миниистирэ Михаил Сивцев көҕүлээһининэн, үөрэх тэрилтэлэрин 30 үлэһитэ Кыайыы күнүгэр анаан сүүрдүлэр.

edersaas.ru

Сүүрүүнү Кыайыы болуоссатыгар сибэкки ууруутуттан саҕалаатылар. Кыайыы күнүн бэлиэтин быһыытынан 9 км сүүрдүлэр. Тэрээһиҥҥэ Кадеттар оскуолаларын үлэһиттэрэ, Эдэр педагогтар ассоциацияларын, СӨ Үөрэҕин уонна наукатын министиэристибэтин уонна да атын үөрэх тэрилтэлэрин бэрэстэбиитэллэрэ кытыннылар.

“Кыайыы күнэ – дойдубут хас биирдии олохтооҕугар суолталаах уонна долгутар бырааһынньык. Бу – Аҕа дойдуну көмүскээччилэрбитигэр өйдөбүнньүк уонна дириҥ убаастабыл бэлиэтэ. Уонунан сыллар ааһаллар, көлүөнэлэр солбуллаллар, ол эрээри, Улуу Кыайыы хаһан даҕаны умнуллуо суоҕа. Хас биирдиибитигэр үүнэр көлүөнэ туһугар тугунан да тэҥнэспэт хорсун быһыыларын иһин киэн туттуу уонна махталлаах санаа иилии кууһар. Күндү бэтэрээннэр, эһиги дьоруойдуу быһыыгытын ытыктыыбыт уонна умнубаппыт. Тыылга үлэлээбиттэр, Кыайыы туһугар аччыктыыры, алдьаныыны-кээһэниини аахсыбакка күүскүтүн уурбуккут. Сэрии ыар сылларын кэнниттэн урусхалламмыт куораттары чөлүгэр түһэрбиккит уонна норуот хаһаайыстыбатын өрө таһаарбыккыт – бэйэни харыстаммат быһыы уонна кытаанах буолуу үтүө холобура. Эһиги, төрөөбүт дойдуну көмүскээччилэр баар буолаҥҥыт, билигин биһиги сайдар, эйэлээх олоххо олорор, хас биирдии күнү айхаллыыр, үөрэ көрсөр кыахтаахпыт”, — диэн миниистир Михаил Сивцев эттэ.

 

СӨ Үөрэҕин уонна наукатын министиэристибэтин пресс-сулууспата.

0
0