Үөрэх кыһалара сарсыҥҥыттан аһыллыахтара

Бөлөххө киир:

Саха сиригэр үөрэх бары көрүҥэ сарсыҥҥыттан, тохсунньу 10 күнүттэн, саҕаланыаҕа. Үөрэх кыһалара санитарнай ирдэбиллэри барытын тутуһан туран, үлэлэрин урукку эрэсииминэн саҕалыахтара.

Оскуолалар бары күнүскү үөрэххэ киириэхтэрэ. Ол эрээри улуустарга, нэһилиэнньэлээх пууннарга, оскуолаларга дьаҥ-дьаһах хайдах турарыттан көрөн биирдиилээн миэрэлэр ылыллыахтарын сөп. Өскөтүн оскуолаҕа дьаҥнаабыт киһи ахсаана элбэх буоллаҕына, оҕолор кэтэхтэн үөрэххэ көһүөхтэрин сөп.

Билигин хас биирдии үөрэх кыһатыгар санитарнай ирдэбиллэри барытын тутуһаллар. Дьокуускай куорат үөрэҕин управлениетын начальнига Алексей Семенов бэлиэтээбитинэн, Дьокуускай хас биирдии оскуолатыгар дьиэни-уоту, миэбэли сууйуу тиһигин быспакка ыытыллар. Ону таһынан оскуола үлэһиттэрэ бары коронавирус утары быһыыны ылалларын хааччыйан олороллор.

Орто, үрдүк үөрэх кыһалара куораттарга, улуустарга эмиэ балаһыанньа хайдаҕыттан көрөн үлэлиэхтэрэ. Үөрэх министиэристибэтэ иһитиннэрбитинэн, куораттарга, оройуоннарга суһал ыстаап уонна Роспотребнадзор хааччаҕы киллэрбэтэх буоллаҕына, устудьуоннар бары күнүскү үөрэххэ көһүөхтэрэ.

М.К.Аммосов аатынан Хотугулуу-илиҥҥи федеральнай университекка күнүскү үөрэҕи таһынан сорох предметтэр кэтэхтэн үөрэтиллэллэр.

Аграфена КУЗЬМИНА

+1
0
+1
0
+1
0
+1
0
+1
0
+1
0
+1
0