Саха сиригэр 2021 сыл тохсунньу 19 күнүнээҕи туругунан, оскуола иннинээҕи үөрэхтээһин тэрилтэлэрэ бары (802 уһуйаан) олоҕурбут көрүҥүнэн үлэлии тураллар.
Биэс уһуйааҥҥа (Бүлүү улууһун Тааһаҕар сэлиэнньэтигэр “Мичээр”, Ленскэй куоракка “Сардаана”, Уус Маайа улууһун Солнечнай бөһүөлэгэр “Солнышко”, Булуҥ улууһун Найба сэлиэнньэтигэр “Тугутчаан”, Чурапчы улууһун Килэҥки сэлиэнньэтигэр “Ньургуйаана”) тоҕус бөлөх быстах кэмҥэ сабыллан турар.
Уопсай үөрэхтээһин тэрилтэлэриттэн 98 оскуола олоҕурбут, 159 – очнай-заочнай, 384 – дистанционнай көрүҥүнэн үлэлии олорор.
Сэттэ оскуолаҕа 9 кылаас быстах кэмҥэ сабыллан турар. Ол иһигэр хамсык дьаҥа булуллубутунан – 6, ОРВИ уонна кириип ыарыыта тарҕанар нуорматын аһарбытынан – 3 (Дьокуускай куоракка – 2, Нерюнгри улууһугар – 3, Өлүөхүмэ улууһугар – 3, Ленскэйгэ — 1).
Халлаан тымныытынан сибээстээн, 477 оскуолаҕа (5808 кылаас) актированнай күннэр биллэриллибиттэрэ, оҕолор дистанционнай көрүҥүнэн үөрэнэллэр.
Орто анал үөрэх тэрилтэтиттэн – 19 дистанционнай, 23 очнай-заочнай көрүҥүнэн үлэлиир. Олоҕурбут көрүҥүнэн Аллараа Халыма улууһун Арктикатааҕы Хотугу норуоттар кэллиэстэрэ үлэлии олорор.
Ытыктабыллаах преподавателлэр, төрөппүттэр уонна үөрэнээччилэр. Уһуйааннарга, оскуолаларга, орто анал уонна үрдүк үөрэх тэрилтэлэригэр хамсык дьаҥа тарҕамматын туһугар, СӨ Үөрэҕин уонна наукатын министиэристибэтэ күннэтэ Саха сирин бары улуустарыгар кэтээн көрүүнү ыытар, дьаҥтан харыстаныы ирдэбилин хонтуруоллуур биэдэмистибэ суһал ыстааба үлэлиир. Сэрэхтээх буолуу бары миэрэлэрин тутуһуҥ, бэйэҕитин уонна чугас дьоҥҥутун харыстааҥ.
СӨ Үөрэҕин уонна наукатын министиэристибэтин пресс-сулууспата.