«Үөрэх флагманнара” куонкуруска Саха сирин устудьуоннара полуфиналга аастылар
Бүтүн Арассыыйатааҕы “Үөрэх флагманнара. Устудьуоннар” диэн куонкуруска Уһук Илинтэн 100 ыччат кытынна, олортон түөрдэ Саха сирин устудьуона буолар. Полуфиналга Уһук Илин Федеральнай уокуругу Приморскай кыраай 32 устудьуона, Амур уобалаһын 27 устудьуона, Хабаровскай кыраай 16 кыттааччыта, Камчатка кыраайыттан 8 киһи, Забайкальскай кыраайтан 7 киһи, ону сэргэ Саха сириттэн 4 устудьуон, Бурятия өрөспүүбүлүкэтин 3 ыччата, Магадан уобалаһыттан 2 киһи, Cахалин уобалаһыттан биир устудьуона кыттыаҕа.
Балар бары ситиһиилээхтик тэйиччиттэн олорон тиэһи толоруу түһүмэҕин ааспыттар. Аны билигин кинилэр полуфиналга киирсиэхтэрэ. Бу куонкурус «Социальные лифты для каждого” диэн “Үөрэхтээһин” национальнай бырайыак иһинэн үлэлиир.
“Үөрэх флагманнара. Устудьуоннар.” диэн идэҕэ туһаайар куонкурус үрдүк, орто үөрэх кыһаларын уонна кэллиэстэр устудьуоннарын өйүүргэ, кинилэри сайыннарыыга туһуламмыт.
Бу бырайыакка кыттан учуутал идэтигэр үөрэнэр устудьуон идэтин толору баһылаан эспиэртэртэн сүбэ ылар кыахтанар.
«Устудьуоннуур сыллар – саамай сырдык, ханнык баҕарар киһи өйүгэр-сүрэҕэр хаалар чаҕылхай кэмнэр. Бэйэлэрин биллэрэртэн куттаммакка тэйиччиттэн олорон тургутугу толорбут устудьуоннарбытын эҕэрдэлиибит. Бэлиэтээн эттэххэ, полуфиналы ааспыт оҕолор истэригэр кэллиэс устудьуоннара эмиэ бааллар. Бу куонкурус эһиги үүнэргитигэр, сайдаргытыгар тирэх буоллун», — диэн «Россия – страна возможностей” генеральнай дириэктэрэ Алексей Комиссаров санаатын тиэртэ.
Куонкуруска кыттыы сайаапкатын хомуйуу үлэтэ ааспыт сыл сэтинньи ыйыттан үүммүт сыл тохсунньутугар диэри ыытыллыбыта. Бу кэм устата studtrek.ru сайтка 27000 араас үөрэх кыһаларын устудьуоннара Арассыыйа 84 эрэгийиэниттэн кыттыбыта. Балартан 804 устудьуон үрдүк баалы ылан полуфиналга ааспыттара. Аны 150 саамай күүстээхтэр хаалан финалга көрсүөхтэрэ.
Куонкурус призердара Арассыыйатааҕы «Смена”, “Океан” оҕо кииннэригэр араас үөрэх бырагырааматын нөҥүө стажировкаланар кыахтаныахтара.
Ульяна ЗАХАРОВА.