Коронавируһунан сибээстээн, СӨ Үөрэҕин уонна наукатын министиэристибэтигэр “быһа линия” төлөпүөнэ үлэлиир. Төрөппүттэр, учууталлар үөрэххэ сыһыаннаах ыйытыыларыгар хоруйдары биэрэллэр.
СӨ Үөрэҕин уонна наукатын министиэристибэтигэр иһитиннэрбиттэринэн, кулун тутар 18 күнүттэн 118 ыйытыы киирбит. «Дьон сүрүннээн дуогабарынан (целевой) үөрэнэр устудьуоннары аҕалыы, субсидиялаах авиа билиэт, тэйиччиттэн олорон (дистанционно) үөрэнии, “Учи.ру” үөрэх систиэмэтигэр холбонуу, эксээмэннэр, “сухуой пайек”, ыраахтан олорон үөрэнии кэмигэр көрүллэр босхо аһылык, устудьуоннар быраактыкаларын туһунан туоһулаһаллар», — диэн эттилэр.
Оттон Арассыыйа Үөрэҕириигэ министиэристибэтин “быһа линиятыгар” бу кэм устата дойду араас муннугуттан 4500 киһи төлөпүөннээбит. Кэлиҥҥи сууккаҕа 382 ыйытыы киирбит. Ыйытыы 32 % сынньалаҥ, чэпчэтиинэн туһанар үөрэнээччилэргэ аһылыгы көрүү, Бүтүн Арассыыйатааҕы бэрэбиэркэлиир үлэ туһунан эбит.
Санатан эттэххэ, РФ Үөрэҕириигэ министиэристибэтин “быһа линиятыгар” +7 (800) 200-91-85 эбэтэр СӨ Үөрэҕин уонна наукатын министиэристибэтин 8 (4112) 506-928 нүөмэрдэригэр төлөпүөннээн үөрэххэ сыһыаннаах ыйытыыларгытыгар хоруйдары ылыаххытын сөп.
Людмила ПОПОВА, edersaas.ru