Инбэлиит уонна доруобуйаларыгар хааччахтаах оҕолор доруобуйаларын чөлүгэр түһэрэр (реабилитационнай) киин 2018 с. бастакы декадатыгар аһыллара былааннанар.
Бу туһунан СӨ үлэҕэ уонна социальнай сайдыыга миниистир Александр Михеев, Реабилитиционнай киин үлэһиттэрэ суруналыыстары кытары көрсүһүүгэ иһитиннэрдилэр. Эбийиэккэ тутуу сүрүн үлэлэрэ түмүктэммиттэр. Миэбэллэри уонна технологическай тэриллэри таҥыы, сааһылааһын үлэтэ бара турар.
Эбийиэги тутуу суумата аан бастаан 800 мөлүйүөн солкуобайынан ааҕыллыбыта. Ол гынан баран, Киини үрдүк технологиялаах тэрилинэн хааччыйарга кэлэр көлүөнэ тус сыаллаах фондатыттан эбии 150 мөлүйүөн солкуобай көрүллэр буолбут. Бу туһунан быһаарыы өссө атырдьах ыйыгар ылыллыбыт.
Саҥа дьиэ 100 куойкалаах, ону таһынан күнүс сылдьан эмтэнэргэ 150 миэстэлээх.
Уопсайа, 12500 кв. миэтиргэ тайаан сытар. Биэс куорпустаах. Бастакы куорпуска мунньахтыыр, спорт уонна тренажер саалалара бааллар. Иккис куорпуска — медицинскэй-реабилитационнай кииҥҥэ эмтиир кабинеттар, үөрэнэр кылаастар уонна олус кыраһыабай бассейн үлэлиэхтэрэ. Үһүс куорпус үөрэнэргэ, доруобуйаны чөлүгэр түһэрэргэ аналлаах. Онтон төрдүс куорпуска оҕолор сытар уонна үөрэнэр сирдэрэ олохтоммут. Бэһис блокка 150 миэстэлээх күнүскү стационар уонна остолобуой үлэлиэхтэрэ. Оҕолорун кытары кэлбит төрөппүттэр 30 миэстэлээх, аныгылыы тутуулаах гостиницаҕа түһүөхтэрин сөп. Маны таһынан оҕолорго иппотерапияҕа аналлаах көнньүүһүнэ баар.
Билигин доруобуйаны чөлүгэр түһэрэр үс Киин баарыттан биирэ Нерюнгрига, иккиһэ Ньурбаҕа үлэлииллэр. Үһүөннэригэр сыл аайы 2 тыһыынча курдук оҕо (наадыйааччылартан 60 бырыһыаннара) тустаах көмөнү ылар.
х х х
Өрөспүүбүлүкэ киин куоратыгар тутуллубут саҥа киин үлэҕэ киирдэҕинэ, 2018 сылга – 3 тыһыынча, 2019 сылга 3,5 тыһыынча инбэлиит уонна доруобуйаларыгар хааччахтаах оҕолору ыларга былаанныыллар.
Манна киирбит оҕолор эмтэнэллэрин сэргэ, социальнай адаптацияны ааһыахтара, ыраахтан үөрэтиигэ (инклюзивнай) бэлэмнэниэхтэрэ. Ону сэргэ оҕолор төрөппүттэригэр сөптөөх болҕомто ууруллуоҕа, анал үөрэхтэр ыытыллыахтара. Инбэлиит оҕолор доруобуйаларын чөлүгэр түһэриигэ биирдиилээн оҥоһуллар бырагыраамалар хаачыстыбалара тупсуоҕа. Аныгы технологиялар уонна ньымалар көмөлөрүнэн инбэлиит оҕо өлүүтэ аҕыйыыра сабаҕаланар, кырачааннар эмтэнэр усулуобуйалара тупсуоҕа. Манна сыһыаран эттэххэ, Дьокуускайга ыарахан ыарыылаах оҕолорго анал көмөнү оҥорор доруобуйа харыстабылын бөдөҥ эмтиир тэрилтэлэрэ бары биир сиргэ бааллара табыгастаах. Онон, өрөспүүбүлүкэ бары улуустарыттан (ол иһигэр Арктика, Хоту, киин уонна Илин эҥээр) кэлэн эмтэниэхтэрэ. Уһук Илиҥҥи федеральнай уокуруктан эмиэ кэлиэхтэрин сөп.
ЫСПЫРААПКА:
2017 с. от ыйын 7 күнүнээҕи туругунан:
10 тыһыынчаттан тахса доруобуйатынан хааччахтаах оҕо баар.
Кинилэртэн 6053 – инбэлиит.
52,4 бырыһыаннара Дьокуускай куоракка уонна чугас сытар улуустарга олороллор.
Надежда ЕГОРОВА, «Саха сирэ» хаһыат, edersaas.ru
Андрей СОРОКИН түһэриилэрэ.