Аан дойду дьахталларын күнүн иннинэ Кыра уонна саастарын ситэ илик оҕолор доруобуйаларын чөлүгэр түһэрэр өрөспүүбүлүкээҕи кииҥҥэ Ийэ сылыгар аналлаах “Үөрэ-көтө сырыт, күндү ийэкээм” диэн ааттаах тэрээһин бэрт сэргэхтик буолан ааста.
Тэрээһини киин дириэктэрэ Зинаида Семеновна Максимова эҕэрдэ тылынан аста.
“Иматон” психология киинин (Санкт-Петербург к.) преподавателэ, психолог Татьяна Сабарайкина доруобуйатыгар хааччахтаах оҕону иитиигэ дьиэ кэргэн көрсөр ыарахаттарын хайдах туоруурга сүбэ-ама биэрдэ, бэйэтин уопутун кытта үллэһиннэ.
Өрөспүүбүлүкэтээҕи маммологическай киин салайааччыта Любовь Коростелева ыарыыны сэрэтэр, эрдэттэн хайдах билэр, харыстанар туһунан кэпсээтэ.
Билиҥҥи кэмҥэ олус туһалаах сөпкө тыыныы эрчиллиилэрин хайдах оҥоруохха сөбүн Оҕо айымньытын дыбарыаһын педагога Анастасия Третьякова олус сэргэхтик ыытта. Кинини кытта ийэлэр бары үөрэ-көтө тэҥҥэ оҥорустулар.
Өлөөнтөн сылдьар култуура үлэһитэ Сардаана Симонова сис уонна сүһүөх чөл буоларыгар аналлаах хамсаныылары көрдөрөн, бары да бэркэ табыллан оҥордубут.
Трайфл диэн аныгылыы минньигэс аһы оҥорорго маастар-кылааһы Хаҥаластан кэлбит Анна Иванова ыытта. Кини сүбэтинэн хас да ийэ аҕыйах мүнүүтэ иһигэр кэрэ көстүүлээх минньигэс ас наборун оҥорон таһаардылар. Бу набор саалаҕа баар ийэлэртэн саамай баартаахтарыгар – икки оҕо ийэтэ Анна Прохороваҕа буор-босхо тигистэ. Онон Анна үөрүүтэ үрдээтэ.
Ботаническай саад дириэктэрэ Наталья Иванова бу сотору саҕаланаары турар саад, оҕуруот үлэлэригэр сүбэлэри биэрдэ, ыйытыыларга сиһилии эппиэттээтэ.
Ийэлэргэ анаан эҕэрдэ нүөмэрдэри айар талааннаах Намыына, Анастасия Третьякова, Василий Новоприезжай бэлэхтээн, сааскы тыыны үөскэттилэр.
Тэрээһин туһунан санаалар
Варвара Соловьева 6 саастаах уолун уонна 2 саастаах сиэнин кытта Кэбээйиттэн кэлбит:
— Биһиги бу Кулун тутардааҕы тэрээһиҥҥэ түбэһэн наһаа үөрдүбүт. Наһаа туһалаах-сүбэ-ама бөҕө иһиттибит, элбэҕи биллибит-көрдүбүт, сайынныбыт. Билиҥҥэ кэмҥэ саамай наадалаах маастар-кылаастар, көрсүһүүлэр буоллулар. Бу тэрээһиҥҥэ кэлэн сынньанныбыт – оҕолору Киин педагогтара көрөр буолан, син наҕылыччы сырыттыбыт. Биһиэхэ кыра да болҕомто наада.
Сардаана Симонова:
— Мин наһаа үчүгэй тэрээһиҥҥэ сылдьан, наһаа үөрдүм. Маастар-кылааһым кэмигэр ийэлэр үөрбүт-көппүт харахтарын көрөн, хата бэйэм астынным. Бу кыһын балтыбын кытта кини оҕотун эмтэтэ Кисловодскайга сылдьыбыппыт. Онно ити хамсаныылары үөрэппиттэрин бүгүн ити көрдөрдүм.
Бука бары ийэлэри кэлэн иһэр Аан дойду дьахталларын күнүнэн итиитик-истиҥник эҕэрдэлиибин.
Мария Решетникова, edersaas.ru саайтка анаан.
Хаартыска: ааптар түһэриитэ.