2017-2019 сылларга нэһилиэнньэҕэ босхо медицинскэй көмөнү оҥорууга судаарыстыбаннай мэктиэлэр бырагыраамалара олоххо киллэриллэллэр.
Надежда ЕГОРОВА, «Саха сирэ» хаһыат, edersaas.ru
Ол курдук, Саха Өрөспүүбүлүкэтигэр үрдүк технологиялаах медицинскэй көмөнү 7 эмтиир тэрилтэҕэ (ол иһигэр, Медицина Национальнай киинигэр, Өрөспүүбүлүкэтээҕи 2 №-дээх балыыһаҕа, харах өрөспүүбүлүкэтээҕи клиническэй балыыһатыгар) оҥороллор.
СӨ доруобуйа харыстабылын миниистирэ Михаил Охлопков брифиҥҥэ иһитиннэрбитинэн, 2016 с. үрдүк технологиялаах көмөнү 5927 киһи ылбыт (2015 с. – 4879 этэ). Кинилэртэн 60-ча бырыһыаннара өрөспүүбүлүкэ балыыһаларыгар эмтэммит. Онуоха үбүлээһин 2016 с. федеральнай, өрөспүүбүлүкэ бүдьүөттэриттэн уонна Булгуччулаах медицинскэй страховкалааһын территориятааҕы фондатын үбүн суотугар оҥоһуллубут.
Итинник көмөнү инникитин, барыллааһын быһыытынан, өрөспүүбүлүкэ клиникаларыгар 1359 киһи ылыаҕа. Онуоха өрөспүүбүлүкэ бүддьүөтүгэр 218 161,00 тыһыынча солк. көрүлүннэ, РФ бүддьүөтүттэн 68 110,4 тыһ.солк. суумалаах субсидия бэрилиннэ.
Ону таһынан, 2017 с. өрөспүүбүлүкэ 2400 олохтооҕо федеральнай анал медицинскэй кииннэргэ эмтэнэр кыахтаныа.
Надежда ЕГОРОВА, «Саха сирэ» хаһыат, edersaas.ru