Аныгыскы нэдиэлэҕэ, ол эбэтэр, кулун тутар 17-19 күннэригэр Сунтаарга Николай Николаевич Тарскай кэриэһигэр өрөспүүбүлүкэ көҥүл тустууга биирдиилээн уонна хамаанданан бастыыр иһин чөмпүйэнээтэ ыытыллаары турар. Саха сиригэр бастакы нүөмэрдээх спорт көрүҥэр сыл биир саамай кэтэһиилээх уонна быһаарыылаах түһүлгэтэ Бүлүү бөлөх улууһугар аан бастаан ыытыллар. Онон эппиэтинэс улахан диэххэ сөп. Чөмпүйэнээти бэлэмнээн уонна тэрийэн ыытыыны билсээри Сунтаар улууһун дьаһалтатын дьыалаларга управляющайа Н.Е.Егоровы кытта төлөпүөнүнэн кэпсэтэ сырыттым.
Петр ПАВЛОВ, “Саха сирэ”, www.edersaas.ru
-Чөмпүйэнээт Алкивиад Исидорович Иванов аатын сүгэр Олимпийскай эрэллэри бэлэмниир оҕо спортивнай оскуолатын манеһыгар икки көбүөрүнэн ыытыллыаҕа, — диир Николай Егорович. – Көбүөрдэр ирдэбил быһыытынан, 80 см үрдүктээх помостка тэлгэтилиннилэр. Быһа холуйан 400-чэкэ киһи олорон көрөр трибуната бэлэмнэннэ. Билиҥҥи туругунан чөмпүйэнээккэ хоту улуустартан ураты 22 хамаанда сайаапкатын киллэрэн турар. Спортсменнары, тэрийээччилэри уонна бочуоттаах ыалдьыттары хонноруу, аһатыы боппуруостара барыта быһаарыллан турар. Бочуоттаах ыалдьыттарынан СӨ бырабыыталыстыба бэрэссэдээтэлин солбуйааччы Михаил Гуляев, спорт миниистирэ Георгий Балакшин, олимпийскай чөмпүйүөн Павел Пинигин, тустуу өрөспүүбүлүкэтээҕи федерациятын бэрэсидьиэнэ Семен Березин, Ил Түмэн дьокутаата Александр Уаров уо.д.а. буолуохтара.
Чөмпүйэнээти бэлэмнээн уонна тэрийэн ыытыыга улуус баһылыга Анатолий Васильевич Григорьев салайааччылаах анал хамыыһыйа тэриллэн, үлэтин үгэнигэр сылдьар. Ол курдук ыалдьыттары көрсүү, аһатыы, хонноруу, култуурунай бырагырааманы бэлэмнээһин, наҕараадалааһын, о.д.а. анал хамыыһыйалар бэлэмнэнии түбүгэр сылдьаллар. Бэйэбит улууспут хамаандата тренер Николай Романович Данилов салалтатынан анал үөрэтэр-эрчийэр түмсүүнү тэрийэн ыытта. Онон тустууктарбыт дьиэлэригэр-уоттарыгар, төрөөбүт истиэнэлэригэр ситиһиилээхтик кытталларыгар баҕарабыт. Састаапка Николай Охлопков, Револий Самсонов, Ньургун Сергин, Владимир Данилов, Павел Алексеев курдук күүстээх тустууктар бааллар. Хамыыһыйа быһаарыытынан, 8 ыйааһыҥҥа үс бастакы миэстэни ылбыт бөҕөстөргө туһааннааҕынан – 15, 10, 5 уонна чөмпүйүөнү бэлэмнээбит тренергэ 5 тыһ. солк. харчынан бирииһи улуус нэһилиэктэрин дьаһалталара олохтоотулар. Ону тэҥэ предпринимателлэр уонна биирдиилээн спонсордар көмөлөрүнэн 11 араас анал бириистэр олохтонуохтара. Холобур, “Чөмпүйэнээт бастыҥ бөҕөһө”, “Бастыҥ техникалаах бөҕөс”, “Көрөөччүлэр биһирэбиллэрэ”, о.д.а. курдук.
Сунтаардар хаһан баҕарар ыалдьытымсахтарынан уонна тэрээһиннээхтэринэн биллэллэр. 2006 сыллаахха Саха сирин норуоттарын спортивнай оонньууларын хайдах курдук кыайа тутан тэрийбиттэрэй. Онон бу даҕаны чөмпүйэнээт үрдүк таһымнаахтык ыытылларыгар эрэл улахан.
Санатан эттэххэ, былырыын Н.Н.Тарскай аатынан чөмпүйэнээт Намҥа ыытыллыбыта. Онно бэйэлэрин ыйааһыннарыгар кыайыылаахтарынан буолбуттара: 57 кг – Арыйаан Тютрин (Уус Алдан), 61 кг – Николай Охлопков (Сунтаар), 65 кг – Виктор Рассадин (Орто Халыма), 70 кг – Константин Власов (Чурапчы), 74 кг – Герман Устинов (Амма), 86 кг – Леонид Спиридонов (Хаҥалас), 97 кг – Вадим Семенов (Нам), 125 кг – Евгений Коломиец (Орто Халыма). Оттон хамаанданан түмүккэ Нам бастакы, Уус Алдан иккис, Чурапчы үһүс буолбуттара.
Петр ПАВЛОВ, “Саха сирэ”, www.edersaas.ru
Ааптар хаартыскаҕа түһэриитигэр: былырыыҥҥы чөмпүйэнээт «Бастыҥ бөҕөһүнэн» Николай Охлопков ааттаммыта.