Уопсастыба

Үрдүкү суут маасканы кэтии эрэсиимин хаалларарга уураахтаата

Арассыыйа Үрдүкү суута «Лига защитников пациентов» бөлөх ирдэбилин толорорго аккаастаата. Бу ирдэбили балтараа тыһыынча кэриҥэ киһини түмпүт бөлөх Арассыыйаҕа мааска эрэсиимин төлөрүтүүнү ситиһээри суукка биэрбитэ.

Кинилэр этэллэринэн, доруобуйа харыстабылын ситэ сатаан, атын гражданскай бырааптар кэһиллэллэр. Ону таһынан, бэрэстэбиитэллэрэ Александр Саверский этэринэн, астманан ыалдьар, сирэйигэр эпэрээссийэлээх дьон мааскаттан сылтаан олоҕугар уонна доруобуйатыгар улахан хоромньуну ылбыт. “Холобур, дьүлэй дьон киһи уоһун кэтээн көрөн кэпсэтэр. Мааска кинилэр алтыһар ньымаларын сарбыйар”, — диир. Бу бөлөх бэрчээккэни уонна санитайзеры туһаныыны эмиэ утарарын биллэрдэ.

Ирдэбили утары эппиэттээччинэн Роспотребнадзор буолла. Бу салалта интэриэһин суукка көмүскээччи этэринэн, маасканы кэтии булгуччулаах эрэсиимэ сүрүн гражданскай бырааптары кэспэт, санитарнай сокуоннар чэрчилэринэн бу эрэсиим дойдуга баар нуормаларга сөп түбэһэр. Роспотребнадзор көмүскүүр салаатын Генеральнай прокуратура өйөөтө. Суут кинилэр эппит тылларын ылынан мааска эрэсиимин көтүрэри аккаастаата.

«Саха сирэ» хаһыат, edersaas.ru

Хаартыска: Регнум

0
0