Бүгүн СӨ Үрдүкү суутугар икки киһини өлөрүөхсүккэ бириигэбэр тахсыбытын туһунан СӨ Борокуратууратын уонна СӨ Үрдүкү суутун пресс-сулууспалара иһитиннэрдилэр.
Суут быһаарбытынан, 2016 сыл ахсынньы 17 күнэ үүнэр түүнүгэр Хаҥалас улууһун Покровскай куоратыгар Василий Ш. бииргэ арыгылыы олорбут дьонун кытта тыл-тылга киирсибэккэ, кыраны да сылтах оҥостон, 15-16 см биилээх быһахтарынан анньан уонна 35 киилэ ыйааһыннаах штанганан охсон, икки киһини миэстэтигэр тыыннарын быспыт.
Дьиэлээх хаһаайын эмиэ төбөҕө уонна моонньугар быһаҕынан анньыллан баран, биир кыыстыын хоско куотан быыһаммыттар.
Ол кэмҥэ кыбартыыраҕа бу иннинэ кэлэ сылдьыбыт биир уол төннөн кэлэн, туох буолбутун көрөн, куотан тахсан, ыаллары полицияны ыҥыралларыгар көрдөспүт. Инньэ гынан, кыыллыйбыт бөрөстүүпүнньүгү полицейскайдар миэстэтигэр туппуттар.
Силиэстийэ да, суут мунньаҕын да кэмигэр өлөрүөхсүт буруйун ончу билиммэтэх. «Тугу да өйдөөбөппүн» диэн куотуна сатаабыт. Ол эрэн, стационарнай судебнай психолого-психиатрическай экспертиза быһаарбытынан, бу киһийдэх туох да ыарыыта суох, ыар буруйу оҥорор кэмигэр көннөрү итирик эрэ сылдьыбыт эбит.
СӨ Үрдүкү суута өлөрүөхсүт Василий Ш-вы 19 сылга кытаанах эрэсиимнээх холуонньаҕа көҥүлүн быһарга уурда. Итиэннэ эмсэҕэлээччилэргэ уопсайа 1 мөл. 800 тыһ. солк. сууммалаах хоромньуну төлүөхтээх. Бириигэбэр сокуоннай күүһүгэр киирэ илик.
Биһиги корр., «Саха сирэ» хаһыат, edersaas.ru
Хаартыска: СӨ Үрдүкү суутун пресс-сулууспата.