СӨ Үрдүкү суутун пресс-сулууспата иһитиннэрбитинэн, кулун тутар 21 күнүгэр Үрдүкү суут судебнай коллегията Борис Попов уонна кини адвокаттарын, ону тэҥэ, борокуратуура апелляционнай үҥсүүлэрин көрбүт.
2018 сыл тохсунньу 14 күнүгэр Дьокуускай куорат федеральнай суута Борис Попову дуоһунас боломуочуйатын аһара барыыга буруйдааҕынан билинэн, 4 сылга көҥүлүн быһары усулуобунайынан ааҕан, 2 сыл 6 ый тургутар болдьоххо уурбута. Маны сэргэ, 2 сыл устатыгар судаарыстыбаннай уонна муниципальнай дуоһунастарга үлэлиир быраабын быспыта.
Маныаха буруйу оҥоруу састааба суоҕунан, Попов иккис дьыалата сабыллыбытын санатабыт.
Борис Попов хара маҥнайгыттан буруйун билиммэт, «сфабрикованнай дьыала, буруйум суох» диэн этэр буолан, суут бу уурааҕын Үрдүкү суукка ааһынар санаалааҕа.
Ол ааһынан, Үрдүкү суут Дьокуускай куорат бириигэбэрин көтүрдэ, дьыаланы саҥаттан, атын судьуйа көрөрүгэр ыытта. Холуобунай-процессуальнай сокуону кэһиилээх бириигэбэр тахсыбыт диэн.
Санатар буоллахха, Ньурба улууһун урукку баһылыга Борис Поповка холуобунай дьыала 2016 сыл ахсынньы ыйыгар тэриллибитэ. Дьыаланы РФ Силиэстийэлиир кэмитиэтин Саха сиринээҕи управлениетын оччотооҕу салайааччыта, генерал Олег Мезрин тэрийбитэ. Бириигэбэр бу дьыалаҕа икки сыл буолан баран тахсыбыта.
Биһиги корр., «Саха сирэ», edersaas.ru
Хаартыска: ЯСИА