СӨ Үрдүкү суутун бэрэссэдээтэлинэн 1999 сыллаахтан үлэлээбит Людмила Горева 2017 сыллаахха астаапкаҕа барбытын туһунан суруйан турабыт. Ол кэмтэн ыла өрөспүүбүлүкэ Үрдүкү суута бэрэссэдээтэлэ суох үлэлээн кэллэ.
СӨ Үрдүкү суутун пресс-сулууспата иһитиннэрбитинэн, президент Владимир Путин бу дьыл кулун тутар 18 күнүнээҕи 106 №-дээх ыйааҕынан Саха Өрөспүүбүлүкэтин Үрдүкү суутун бэрэссэдээтэлинэн Любовь Летучих ананна. Алта сыл үлэлиир боломуочуйалаах.
Санатар буоллахха, бу үрдүкү дуоһунаска кандидатураларын Дьокуускай куорат федеральнай суутун бэрэссэдээтэлэ Иван Винокуров, СӨ Үрдүкү суутун бэрэссэдээтэлин солбуйааччы Александр Седалищев, СӨ Үрдүкү суутун судьуйалара Евдоким Оконешников уонна Валерий Окороков киллэрэн тураллар.
Любовь Летучих кандидатуратын ааспыт сыл сэтинньи ыйыгар Судьуйалар Үрдүкү квалификационнай коллегиялара өйөөбүтэ.
Ыспыраапка: Летучих Любовь Егоровна 1966 сыл олунньу 15 күнүгэр төрөөбүт.
1991 сыллаахха М.К. Аммосов аатынан Саха судаарыстыбаннай университетын «Правоведение» исписээлинэһин бүтэрбит.
1993 сыл кулун тутар 25 күнүгэр Дьокуускай куорат норуодунай суутун норуодунай судьуйатынан талыллыбыт.
1998 сыл муус устар 5 күнүттэн — Дьокуускай куорат суутун бэрэссэдээтэлин холуобунай дьыалаларга солбуйааччытын эбээһинэһин толорооччу.
1999 сыл тохсунньу 9 күнүттэн — Дьокуускай куорат суутун бэрэссэдээтэлин солбуйааччы.
2010 сыл олунньу 8 күнүттэр — Дьокуускай куорат суутун бэрэссэдээтэлэ.
2014 сыл алтынньы 27 күнүттэн — СӨ Үрдүкү суутун бэрэссэдээтэлин солбуйааччы.
Биһиги корр., «Саха сирэ» хаһыат, edersaas.ru
Хаартыска: Вера Макарова, «Саха сирэ» хаһыат