Арассыыйа университеттара коронавирустан быһыыны ылбыт устудьуоннары үөрэх куорпустарыгар QR-куодунан киллэриэхтэрин сөп.
Ити туһунан РФ Наукаҕа уонна үрдүк үөрэххэ министиэристибэтин пресс-сулууспата ТАССка иһитиннэрбит. “Үөрэх туһунан федеральнай сокуоҥҥа олоҕуран, үрдүк үөрэх тэрилтэлэрэ үөрэх хаамыытын тэрийиини быһаарыыга уонна бэйэлэрин үөрэхтэрин тэрилтэлэригэр коронавирус дьаҥын тарҕатыыны бохсор үлэ хайысхатыгар миэрэлэри киллэрэр бырааптаахтар”, — диэн ыйытыы-сурукка министиэристибэ хардарар.
Ону тэҥэ, пресс-сулууспа бэлиэтииринэн, РФ Наукаҕа уонна үрдүк үөрэххэ министиэристибэтэ үрдүк үөрэх тэрилтэлэрэ эпидемиологическай балаһыанньаны учуоттаан үлэлээһиннэригэр бэйэтин көрүүтүн сэтинньи 2 күнүнээҕи бирикээскэ суруйбута. Тустаах докумуоҥҥа олоҕуран, 2021 сыл сэтинньи 8 күнүттэн үрдүк үөрэх уонна билим (наука) тэрилтэлэрэ устудьуон бэйэтэ үөрэнэр (самостоятельнай) көрүҥүн эбэтэр дистанционнай технологияны туһанан тэйиччиттэн үөрэниитин киллэрэр бырааптаахтар.
Москва уонна Москва уобалаһын үрдүк үөрэхтэрин ректордарын сэбиэтэ университеттарга киирэргэ QR-код экспэримиэнин ыытар туһунан эрдэ кэпсэппитэ. Үрдүк үөрэх тэрилтэлэригэр “ковид-фри” зоналар баар буолалларын хааччыйыллыахтаах.
Москва куорат педагогическай университета сэтинньи 15 күнүттэн күнүскү үөрэххэ үөрэнэр устудьуоннары QR-коду көрдөрөн киирэллэрин курдук быһаарыыларын ылыммыта. Мэдиссиинэ өттүнэн быһыы ылаллара көҥүллэммэт уонна 18 саастарын туола илик устудьуоннарга босхо экспресс-тест тэриллиэҕэ. Быһыыны ылбатах устудьуоннарга уонна мэдиссиинэ көрүүтүнэн быһыы ылартан босхоломмотох үөрэнээччилэргэ дьарыктар дистанционнай көрүҥүнэн барыахтара.
Салгыы ыйыллыбыт сигэнэн киирэн ааҕыҥ.
Хаартыска: realnoevremya.ru