Үөрэх уонна наука

Үрдүк үөрэхтэр бакалавриакка, специалитекка күнүскүгэ докумуону тутан бүттүлэр

Өрөспүүбүлүкэҕэ баар үрдүк үөрэхтэр бакалавриат уонна специалитет бырагыраамаларынан бүддьүөт миэстэлэригэр күнүскү үөрэххэ докумуоннары тутан бүттүлэр. Төһө элбэх сайабылыанньа киирбитий? Түмүк хаһан тахсарый?

edersaas.ru

Арктикатааҕы судаарыстыбаннай агротехнологическай университет киин тутар хамыыһыйатын салайааччыта Павлина Васильева иһитиннэрбитинэн, тустаах үөрэх кыһатыгар бакалавриат уонна специалитет бырагыраамаларыгар 2500-тэн тахса докумуон киирбит.

2022-2023 үөрэх дьылыгар университекка орто уонна үрдүк үөрэх бырагыраамаларынан, уопсайа, 1119 миэстэ бүддьүөттэн тыырыллыбыт.

Бүддьүөт суотугар “агрономия”, “лесоинженернэй дьыала”, “зоотехния”, Өктөмнөөҕү филиалга “агрономия”, “агроинженерия” бырагыраамаларынан эбии ылаллар. Ону таһынан, бүддьүөт миэстэтигэр кэтэхтэн үөрэххэ, орто анал идэлэргэ итиэннэ төлөбүрдээх үөрэхтэргэ докумуону тутуу салҕанар.

Бакалавриат уонна специалитет бырагырааматынан бүддьүөт суотугар күнүскү үөрэххэ туттарсааччылар үөрэххэ киирбиттэрин туһунан бирикээһи икки түһүмэҕинэн таһаарыахтара. Бастакыга уһулуччу тутуллар миэстэлэр (приоритетное зачисление в пределах квот) – от ыйын 30 күнүгэр. Иккискэ — сүрүн түһүмэх (основной этап), атырдьах ыйын 9 күнүгэр. Абитуриеннар докумуоннарын дьиҥнээҕин (оригинал документа) уонна үөрэххэ киирэргэ сөбүлэҥин (согласие на зачисление) бу ыйыллыбыт күннэргэ диэри тиксэрэллэрэ ирдэнэр.

Арктикатааҕы култуура уонна искусство судаарыстыбаннай институтун пресс-сулууспата биллэрбитинэн, ааспыт нэдиэлэтээҕи туругунан 635 сайабылыанньа киирбит. Ордук элбэх сайабылыанньаны “дизайн”, “бибилэтиэкэ-информация уонна түмэл үлэтигэр сыыппара технологията”, “актер искусствота” уонна “графика” хайысхаларыгар биэрбиттэр. Быйыл биир миэстэҕэ ортотунан үс киһи куонкурустаһар диэн институт киин тутар хамыыһыйата иһитиннэрбит.

Санатан эттэххэ, быйыл институкка 183 бүддьүөт миэстэтэ көрүллүбүт уонна РФ Үрдүк үөрэххэ, билимҥэ министиэристибэтинэн, Саха Өрөспүүбүлүкэтин бырабыыталыстыбатынан эбии тус сыаллаах миэстэлэр бэриллибиттэр.

Арктикатааҕы култуура уонна искусство судаарыстыбаннай институтугар  уһулуччу тутуллар миэстэлэргэ (приоритетное зачисление по квотам) киирии от ыйын 31 күнүгэр, бүддьүөт миэстэлэригэр киирии (зачисление) атырдьах ыйын 9 күнүгэр буолуоҕа. Үөрэххэ киирэргэ сөбүлэҥи (согласие на зачисление) атырдьах ыйын 3 күнүгэр диэри ылаллар.

Үөрэххэ туттарсааччылар кытаатыҥ, ыйыллыбыт болдьоҕу куоттарымаҥ.

 

Людмила ПОПОВА, “Саха сирэ” хаһыат, edersaas.ru

1
0
Telegram Whatsapp