Быйыл Арассыыйаҕа коронавирус өрө туран, хас биирдии тэрилтэҕэ, ол иһигэр үөрэх тэрилтэлэригэр үгүс уларыйыы таҕыста. Үрдүк үөрэххэ докумуону тутуу быйыл хаһааҥҥыттан саҕаланыаҕай диэн сиэрдээх ыйытыы оскуоланы бүтэрээри сылдьар хас биирдии оҕону, төрөппүтү долгутар.
СӨ Үөрэҕин уонна наукатын министиэристибэтин пресс-сулууспата иһитиннэрбитинэн, РФ наукаҕа уонна үрдүк үөрэххэ министиэристибэтин бирикээһигэр олоҕуран, быйылгы сылга тутар хампаанньаҕа (приемная кампания) уларыйыылар киирбиттэр. Ол курдук, бастатан туран, үрдүк үөрэххэ туттарсааччылар сканердаммыт сайабылыанньаны уонна докумуону электроннай ньыманан туттарыахтарын сөп. Иккиһинэн, үөрэххэ туттарсар тургутуулар (вступительные испытания) чахчы туттарсааччы кини буоларын бигэргэтэр усулуобуйаны хааччыйар түгэнигэр, дистанционнай технолгияны туһанан ыытыллыаҕа.
Ону тэҥэ, тустаах бирикээскэ олоҕуран, дойду бары үрдүк үөрэҕин кыһаларыгар, ол иһигэр Саха сиригэр эмиэ докумуону тутуу бэс ыйын 20 күнүттэн саҕаланыаҕа. Оттон хаһан түмүктэнэрэ биллибэт. Бүгүҥҥүтэ биир кэлим эксээмэн (ЕГЭ) саҥа араспысаанньата бигэргэнэ илик. Онон эксээмэн хаһан буоларыттан көрөн, үрдүк үөрэххэ тутуу болдьоҕо көннөрүллэн биэриэҕэ”, — диэн иһитиннэрдилэр.
Министиэристибэҕэ быһаарбыттарын курдук, үрдүк үөрэххэ докумуону тутуу бэс ыйын 20 күнүттэн саҕаланар. Ол эрээри, докумуону тутуу бүтэһик күнэ, хаһан тургутуулары ыытыы бүтэрэ, үөрэххэ киирии хаһан бигэргэнэрэ (зачисление) биир кэлим эксээмэнтэн тутулуктаах. Онон, бириэмэ баарына сайабылыанньаны электроннай ньыманан хайдах ыытары, туох ирдэнэрин билсэ туруохха сөп. Хас биирдии үрдүк үөрэх кыһатын саайтыгар суруллар.
Людмила ПОПОВА, «Саха сирэ» хаһыат, edersaas.ru