Биллэрин курдук, дойду хайа баҕарар регионугар кэлиҥҥи сылларга балык сыаната биллэрдик ыараата уонна салгыы үрдүү турар. Федеральнай антимонопольнай сулууспа салайааччытын солбуйааччы Андрей Цыганов ыйарынан, Россия ырыынагар балыкка уонна балыктан астаныллар бородууксуйаҕа сыана олоҕо суох үрдэтиллэр, ол элбэх хос-хос атыылатааччы уонна атыылааччы баарыттан сиэттэрэн тахсар, кинилэр бородууксуйаҕа эбиллибит сыананы үөскэппэккэ эрэ кэлтэйдии баламаттык ыаратан иһэллэриттэн дойду хааһыната да, нэһилиэнньэ да улаханнык оҕустараллар.
Василий НИКИФОРОВ, «Саха сирэ» хаһыат, https://edersaas.ru/
Онон, балык бизнеһин хайа муҥун үүннүүргэ уолдьаста. РФ Президенэ Владимир Путин Федеральнай антимонопольнай сулууспаҕа, Тыа хаһаайыстыбатын министиэристибэтигэр уонна Экономиканы сайыннарыы министиэристибэтигэр балык бородууксуйатыгар сыана үрдүүрүн хааччахтааһыҥҥа чопчу этиилэрин 2017 сыл кулун тутар 1 күнүгэр диэри чочуйан киллэрэллэригэр ыйыы биэрдэ. Бу үлэни, Цыганов билинэринэн, ФАС соҕотоҕун кыайбат. «Күлүктээх экономика» баһылаабыт ырыынагар быраабы араҥаччылыыр уорганнар эмиэ кыттыахтара.
Үрдүкү былааспыт хараҕа балыгынан эргинээччилэргэ дьэ хатанна. Саҥа дьаһал салгына биһиги Сахабыт сиригэр биллиэ дуо?..
Василий НИКИФОРОВ.