РФ бэрэсидьиэнэ Владимир Путин бу күннэргэ бырабыыталыстыба састаабын туһунан ыйаах таһаарда. Саҥа ыйааҕынан, бырабыыталыстыба бэрэссэдээтэлэ уон солбуйааччыланыаҕа, сорох министиэристибэлэр ааттарын уларыттылар.
Бырабыыталыстыба састаабыгар биир сүрүн уларыйыынан Үп миниистирэ бастакы вице-премьер бурҕалдьытын сүгүүтэ буолар. Онон сотору кэминэн ананыахтаах миниистир бастакы вице-премьер-үп миниистирэ дуоһунаска олоруоҕа.
Үөрэх уонна наука министиэристибэтэ тус-туһунан арахсан Үөрэх-сырдатыы уонна Наука, үрдүк үөрэх министиэристибэлэригэр уларыйдылар. Санатан эттэххэ, Владимир Путин саҥа “ыам ыйынааҕы ыйааҕыгар” үөрэҕи уонна науканы инники күөҥҥэ тутуллар боппуруостарга киллэрэн турар.
Сибээс министиэристибэтигэр цифровой экономика эбиллэн, Цифровой сайдыы, сибээс уонна маассабай коммуникация министиэристибэтэ буолла. Ону таһынан министиэристибэлэр бэйэлэрин икки ардыларыгар сорох боломуочуйаларын бэрсистилэр. Холобур, Промышленность уонна атыы-эргиэн министиэристибэтигэр тас дойдулары кытары атыыга-эргиэҥҥэ үлэлэһии боломуочуйата сүктэрилиннэ. Владимир Владимирович эмиэ саҥа таһаарбыт ыйааҕыгар тас дойдуга табаары таһааран атыылыыры туспа түһүмэҕинэн бэлиэтээбитэ.
Аграфена КУЗЬМИНА, edersaas.ru