Мэҥэ Хаҥалас кыыһа Ира Ноговицына уруһуйдара киһини абылыыр ураты күүстээхтэр. Ордук Голливуд артыыстарын хайдах баалларынан, хаартыскаҕа түһэрбит курдук, үүт-үкчү гына уруһуйдуур.
– «Сахафильм» киинэ-хампаанньатыгар худуоhунньугунан үлэлии сылдьан, «Таал-Таал эмээхсин» анимационнай киинэ дьоруойдарын уруһуйдаабытым. Кинигэлэргэ кыралаан иллюстрация онорооччубун. Оҕо сылдьан араас кыыллары үтүктэн уруhуйдуурбун ордорорум. Киинэ артыыстарын 2001 сыллаахтан уруhуйдуубун. 2001 – 2004 сылларга быыстала суох дьарыктаммытым. Онтон тохтуу сылдьан баран, бу аҕыйах сылтан бэттэх, дьэ сөргүттүм. Урут акварелинэн, гуаһынан уруhуйдуур эбит буоллахпына, билигин үксүн харандааһынан үлэлиибин.
Ираны устудьуоннуур кэмнэрбиттэн билэбин эрээри, уруһуйдуур дьоҕурдааҕын «Вконтакте» социальнай ситимҥэ көрөн билбитим. Ира идэтинэн – нуучча тылын уонна литературатын учуутала. Кыра эрдэҕиттэн уруйдуурун сөбүлүүр. Оскуолаҕа үөрэнэ сылдьан уруhуй куруhуогар дьарыктаммыт, ол кэнниттэн худуоһунньук-оформитель диэн биир сыллаах кууруска үөрэммит.
– Портрет онорорго психолог буолуохха наада. Киhи майгытын, тугу саныы олорорун таба онорор улахан оруолу оонньуур. Ол иhин портрет оноттороору гыннахтарына сөбүлэспэппин.
Кини саамай сөбүлүүр артыыһа – Рассел Кроу. «Ной», «Робин Гуд», «Гладиатор», «Человек из стали» уонна да атын киинэлэргэ оонньообут дьоруойдарын уратытык, бэйэтин көрүүтүнэн уруһуйдуур. Оннооҕор хас да сыллааҕыта Рассел Кроу Москваҕа кэлэ сылдьан, Ира уруһуйун сэҥээрэн автограбын хаалларбыта.
– 2014 сыллаахха кулун тутар 17 күнүгэр «Ной» киинэ премьератыгар Москваҕа барбытым. Онно «Вконтакте» нөҥүө билсэр доҕотторбун кытары Рассел Кроу пресс-конференциятыгар сылдьыбытым. Ол онно уруhуйдарбар автограф ылан, киэhэтин «кыhыл дорожкаҕа» инники эрээккэ туран, сүрдээх улахан дуоhуйууну, айар күүһү ылан кэлбитим. Рассел Кроу киинэҕэ оонньуур дьоруойдарыныы олус күүстээх энергетикалаах киhи эбит диэн сөхпүппүт.
Испания улуу живописеһа Диего Веласкес мэтириэти таба уруһуйдуур худуоһунньук атын хартыыналары, айылҕаны дьүһүйэр кыаҕа сүдү улахан диэн этэн турар. Онон Ираҕа айар үлэтигэр өссө саҥа суоллары тобуларыгар, ситиһиилэри баҕарабыт.
Анивера АКИМОВА