Сыл бастыҥ бөҕөһө, устудьуоннар ортолоругар аан дойду чөмпүйүөнэ Виктор Рассадин Сунтаарга күтүөттээн кэллэ. Кини кэрэ аҥара – ырыаһыт Юлиана Николаева, Юана диэн аатынан биллэр.
Устудьуоҥка кыыс Юана ырыаһыт быһыытынан саҥа биллэн, тахсан эрэр. Күүстээх куоластаах, артыыс быһыытынан арыллан, сайдан иһэр. “Саҥа ырыа”, “Үрдэл” куонкурустарга ситиһиилээхтик кыттыбыта. “Бастыҥабын кэтиэҕим” диэн Мария Алексеева тылларыгар, Иннокентий Гаврильев матыыбыгар ырыаҕа клип уһуллан, элбэх дьон билэр буолла.
Кыыс дьоно Сунтаарга олороллор. Эһэтэ Николай Николаев-Халлаан Ньукулай – уруккута биллэр тустуук, спорт маастара. Тустууну сэҥээрээччилэр кинини билэллэр. Таайа Владимир Николаев быраас, чааһынай медицинскэй кабинеттаах. Онон түс-бас, сис ыалга күтүөт буолан киирдэ диэн бэлиэтиэххэ сөп.
Быйыл Викторга үгүс кыайыылаах, ситиһиилээх сыл буолла. Арассыыйа чөмпүйэнээтигэр үрүҥ көмүс мэтээли ылбыта, Ярыгин турнирын боруонса, Коркин аатынан норуоттар икки ардыларынааҕы күрэхтэһиитин уонна АЛРОСА Кубогын кыһыл көмүс мэтээлин хаһаайына буолбута. Саха сирин тустууга хамаандатын хапытаана. Кини Орто Халыматтан төрүттээх.
Юлиана уонна Виктор бииргэ сылдьыбыттара син балачча буолла. Социальнай ситимнэргэ бииргэ түспүт хаартыскаларын таһаараллар. Эдэр дьон ситиһиилэрэ, чаҕылхай кыайыылара – барыта иннилэригэр. Бэйэ-бэйэлэрин ситэрсэн биэрэр, нарыннык таптаһар талааннаах, кыраһыабай паара инники олоҕун суола очура суох, дьол, таптал сыдьаайынан эрэ угуттаммыт буоллун!
Ангелина Васильева, “Саха сирэ” хаһыат, edersaas.ru