“Раиса Николаевнабыт “эрэпэтииссийэ!” диэтэ да — ыллаабытынан барабыт…”
(Биир видео устуоруйата)
Дьон баһыйар үксэ билигин дьиэтигэр “хааллан” олордоҕуна, ватсабынан бэрт интэриэһинэй видео тарҕанна – биһиги операбыт чаҕылхай сулустара, таптыыр ырыаһыттарбыт – РФ үтүөлээх, СӨ норуодунай артыыһа Нина Чигирева, РФ уонна СӨ норуодунай артыыһа Альбина Борисова, СӨ үтүөлээх артыыһа Анна Дьячковская массыынанан ханна эрэ айаннаан иһэн, хас да куолаһынан Валерий Ноев “Күөрэгэйин” ыллаан дьиэрэтэллэр! Оттон байааҥҥа СӨ култууратын үтүөлээх үлэһитэ Раиса Крылова доҕуһуоллуур. Видеоҕа норуоттар икки ардыларынааҕы куонкурустар лауреаттара Зинаида Колодезникова устар…
Дьон, ааҕааччыларбыт интэриэһиргииллэр, бу ханна баран иһэн ыллыыгытый, баһаалыста кэпсии түс, диэн көрдөспүппэр, массыынаны бэрт үөрүйэхтик ыытан иһэр Анна Дьячковская маннык хоруйдаата:
—Бу биһиги былырыын саас Тулагыга баран иһэбит. Нина Николаевна, Альбина Михайловна, мин, дьүөгэбит, РСФСР уонна САССР үтүөлээх артыыһа, балерина Клавдия Алексеевна Иванова, эдэр ырыаһыт Зинаида Колодезникова уонна эрэллээх аккомпаниаторбыт Раиса Крылова.
— Туох кэнсиэрэ буолбутай?
—Ээ сөп, Тулагыга, биир идэлээхпит, опернай ырыаһыт Луиза Попова – СӨ үтүөлээхх артыыһа Сергей Попов кэргэнин үбүлүөйдээх кэнсиэригэр кытта баран иһэбит…
— Ким ыллыаҕын диэбитэй?
— Альбиналыын эдэр сааспытыттан иккиэн сөбүлээн ыллыыр ырыабыт… Валерий Ноев ырыата. Ыллаатахха уонна көхтөөх, айаны билбэккэ хаалаҕын…
— Массыынаны ыыппытын ыраатта да?
—10 сыл буолла.
—Уопуттаах ыытааччы эбиккин. Гастролларга массыынанан маннык өссө ханна сылдьыбыккытый?
— Ордук ырааппыта Тааттанан, Чурапчынан, Горнайынан, Покровскайынан, Мэҥэ-Хаҥалас нэһилиэктэринэн сылдьыбыппыт. Мин бэйэм айанныырбын сөбүлүүр буолан, массыынабынан барааччыбыт. Олордубут да айанныыбыт. Уонна, бары үлэбит кэнниттэн буоллаҕа, онон, Раиса Николаевнабыт “эрэпэтииссийэ!” диэтэ да — ыллаабытынан барабыт…
—Кэпсээниҥ иһин махтал, Анна Васильевна!
Дьэ, ырыаны таптааччыларга соһуччу бэлэх буолбут биир видео устуоруйата итинник эбит.
Татьяна МАРКОВА.