Бу күннэргэ үөрүүлээх сонун кэллэ. «Амарах сүрэх» аһымал аахсыйа көмөтүнэн 10 саастаах Радомир Петров элбэх ханааллаах истэр аппарааты ылла. Киниэхэ «Харысхал» пуонда нөҥүө үтүө санаалаах дьон, тэрилтэлэр 474 тыһыынча солкуобайы хомуйан, омук аппараатын ылар кыахтаннылар! Саҥа үөрэх дьылыгар саҥа истэр аппарааттанан, уолчаан сайдарыгар, үөрэнэригэр дьоһун көмө оҥоһулунна.
“Саха сирэ” хаһыат бэс ыйын 9 күнүнээҕи нүөмэригэр “Амарах сүрэх” оҕолорго көмөлөһөр” диэн, бэс ыйын 16 күнүгэр «Раомир истэр, саҥарар буолуоҕа!» диэн ыстатыйалар тахсыбыттара.
2017 сыллаахха оччотооҕу миниистир Александр Борисов көҕүлээһининэн, СӨ сибээскэ, информационнай технологияларга министиэристибэтэ, Саха сирин кылаабынай эрэдээктэрдэрин сэбиэтэ, доруобуйа харыстабылын министиэристибэтэ уонна «SОS Дети Якутии» уопсастыбаннай хамсааһын кыттыһан, «Амарах сүрэх” (“Доброе сердце”) аһымал аахсыйаны саҕалаабыттара. Харчыны хомуйар, сүрүннүүр тэрилтэнэн “Харысхал” аһымал пуонданы талбыттара. “Амарах сүрэх” аахсыйанан аҕыйах сыл иһигэр көмөҕө наадыйар оҕолорго үп-харчы хомуйан, эмтэнэ баралларыгар улахан өйөбүлү оҥорбуттара. Ол курдук, барыта 8 оҕоҕо мөлүйүөнүнэн суумалаах үп хомуллан, оҕолорго бэриллибитэ.
Бу “Амарах сүрэх” аахсыйа тохтуу сылдьыбытын кэнниттэн, быйылгыттан ыла “Харысхал” пуонда “Сахамедиа” холдинг өйөбүлүнэн, сөргүтүлүннэ.
Бастакы хомууру 10 саастаах Радомир Петровка биллэрбиттэрэ. Кини диагноһа: “двусторонняя сенсоневральная тугоухость 3 степени, резидуальная энцефалопатия, задержка речевого развития” диэн. Ол эбэтэр, төрүөҕүттэн истибэт буолан, 7 сааһыгар диэри саҥарбатаҕа. Онон уолчааҥҥа Widex Evoke Fachion 440 диэн истэр аппараат наада. “АудиоСлух” киинтэн икки кулгаахха аппараат чэпчэтиилээх сыаната — 474 600 солкуобай.
Петровтар 4 оҕолоохтор. Улахан кыыстара 9-с кылааска үөрэнэр, мөлтөхтүк истэр эрээри, кыра эрдэҕиттэн саҥарар. Ийэлэрэ ыарахан буолаат да, төрүөҕэр диэри балыыһаҕа сыппыта. Ол онно антибиотиктарынан наһаа эмтэнэн, оҕо истэр кыаҕа буомурбут быһыылаах.
Оттон Радомиры ыарахан сырыттаҕына, УЗИ-га көрөн баран, “оҕо ситэ сайдыбатах, илиитэ-атаҕа кылгас” диэбиттэригэр, ийэ улахан истириэскэ киирбитэ, утуйбат да буолбута. Хаста да төхтүрүйэн, УЗИ-га түһэн, “оҕо доруобай” диэбиттэригэр биирдэ уоскуйбута. Уолчаан төрөөн баран, киһи саҥатын, тыаһы-ууһу истэр, улахан тыастан соһуйар этэ. Ол эрээри, “АКДС” быһыытын ылан баран, туох да тыаска-ууска наадыйбат буолан хаалбыта.
Кыратыгар ийэлээх аҕатын саҥаларын истибэккэ, өйдөспөккө, ньиэрбинэйдиир, хаһыытыыр этэ. 5 сааһыгар диэри саҥарбатаҕа. Онуоха Нерюнгригэ мөлтөхтүк истэр оҕолору эмтиир, реаблитациялыыр кииҥҥэ барарга сүбэлээбиттэрэ. Оҕолорун үөрэттэрэр, сайыннарар туһуттан, ыаллар төрөөбүт-улааппыт дойдуларын хаалларан, сээкэйдэрин атыылаан баран, кими да билбэт, туох да суох сиригэр – Нерюнгригэ көһөн барарга күһэллибиттэрэ. Билигин да дьиэ куортамнаан олороллор.
Ол эрээри, биир ый кииҥҥэ дьарыктанан баран, уол “ийээ, аҕаа” диэн саҥаран үөрдүбүтэ. Тута эбиллибитэ, сайдыбыта харахха быраҕыллар буолбута. Оскуолаҕа үөрэнэригэр, саҥарарыгар эрэл баар буолбута.
Билигин Радомир орто оскуолаҕа 1-кы коррекционнай кылааһы бүтэрдэ. Оскуолаҕа биир сыл хойутаан киирбитэ, онтон “нулевой” кылааска үөрэммитэ. Быйыл балта эмиэ 1-кы кылааһы бүтэрдэ.
Уолчаан бэһиэлэй, үөрэ-көтө сылдьар майгылаах, илиитинэн-атаҕынан хамсанан, оҕолору кытары уопсай тылы түргэнник булар, наһаа тапсар, элбэх доҕоттордоох. Көмпүүтэргэ оонньуурун, “ЛЕГО” бытархай чаастарын, мозаиканы таҥарын сөбүлүүр, бүтэриэр диэри олорор. Дьыалатын барытын тиһэҕэр тиэрдэн тэйэр идэлээх. Дуобаты интэриэһиргиир, кыайдаҕына, наһаа үөрэр. Уһуйааҥҥа 2-с миэстэни ылбыта. Ол эрээри, улуустааҕы күрэхтэһиигэ хотторон баран, интэриэһэ сүтэн, оонньообот буола сылдьыбыттаах.
Үөрэнэргэ олус интэриэстээх. Оскуолаҕа сурдопедагог-учуутал суох, ол эрээри, үөрэтэр учууталын кытары хамсаныы тылынан өйдөһөллөр. Онон ааҕарга, ахсааны суоттуурга үөрэннэ. Билигин Дьокуускайдааҕы истибэттэр оскуолатын учууталлара тэйиччиттэн олорон, нэдиэлэҕэ иккитэ дьарык ыыталларыгар, көмпүүтэргэ үөрэнэр.
Ангелина Васильева, «Саха сирэ» хаһыат, edersaas.ru
Хаартыска: суруйуу дьоруойун архыыбыттан.