Бүгүн, бэс ыйын 21 күнүгэр, 12:20 чааска СӨ Ыксаллаах быһыыга-майгыга министиэристибэтигэр АН-2 сөмөлүөт болдьохтоох кэмигэр “Вертикальнай” былаһааккаҕа тиийбэтэҕин туһунан суһал сурах кэлбит.
Сөмөлүөт Үс Хатыҥ (Дьокуускай) – Вертикальнай (Кэбээйи улууһа) – Үс Хатыҥ (Дьокуускай) хайысханан көтүөхтээх эбит.
Сарсыарда 09.00 чааска көтөр аал «Вертикальнай» былаһааккаҕа тиийиэхтээх эбит эрээри, кэмигэр тиийбэтэх уонна радарга көстүбэт буолбут. Көтөр аал иһигэр үс киһи баар буолуохтааҕа сабаҕаланар (сөмөлүөт 2 экипаһа, 1 пассажир). Тырааныспар 1 туонна таһаҕаһы тиэммит.
Көрдүүр үлэлэри ыытарга үс быыһааччы хамаандата «Полярные авиалинии» авиахампаанньа Ан-26 сөмөлүөтүнэн 12:56 чааска көттүлэр. Билигин сөмөлүөт Ан-2 баар буолуон сөптөөх сирдэрин кэрийэ сылдьар. Маны сэргэ, Ми-8 бөртөлүөт көрдүүр тэрээһиҥҥэ кыттыһарга бэлэм олорор.
Хаартыска — СИА