Москваҕа алтынньы 30 уонна сэтинньи 1 күннэригэр «Арассыыйа доруобуйатын харыстабыла бүгүн: кыһалҕалар уонна быһаарар суоллар» диэн тиэмэҕэ кэнгириэс ыытылынна.
edersaas.ru
Конгресс сүрүн соругунан доруобуйа харыстабылын салаатын үлэһиттэрин күүстэрин Арассыыйа Федерациятын нэһилиэнньэтин доруобуйата тупсарын туһугар түмүү уонна чугастааҕы 5-10 сылларга сайдыы саҕахтарын торумнааһын буолла.
Биллэн турар, нэһилиэнньэ доруобуйатын харыстааһын, демография балаһыанньатын тупсарыы боппуруостара сүрүн болҕомтону ыллылар.
Кэнгириэс кыттыылаахтарын РФ Президенэ Владимир Путин эҕэрдэлээтэ.
Сүрүн дакылааты РФ доруобуйа харыстабылын миниистирэ Вероника Скворцова оҥордо. Кини Арассыыйа Доруобуйатын харыстабылын министиэристибэтэ уонна Национальнай Медицинскэй балаата өр кэмнэргэ бииргэ үлэлииллэрин, онон бу конгресс хардарыта бииргэ үлэлээһиҥҥэ сүрүн миэстэни ыларын бэлиэтээтэ.
Министиэристибэлэр, биэдэмэстибэлэр бэрэстэбиитэллэрэ, сүрүннүүр учуонайдар, экспертэр, быраастар ортолоругар Саха сириттэн медицина 10 доктора кыттыылаах дэлэгээссийэ кытынна. «Саха сирин медицинскэй балаататын» салайааччы, Дьокуускай к. 3 №-дээх поликлиникатын кылаабынай бырааһа Светлана Давыдова иһитиннэрбитинэн, кинилэр Саха сиригэр улахан суолталаах каадыр боппуруоһун дьүүллэһэр «төгүрүк остуолга» уо.д.а. былаһааккаларга кытыннылар.
Норуот хаһаайыстыбатын ситиһиилэрин быыстапкатын (ВДНХ) павильоннарыгар ыытыллыбыт үс күннээх конгресс кэмигэр доруобуйа харыстабылын үлэһиттэрэ мунньуммут үөрүйэхтэрин үллэһиннилэр, эмтээһин саҥаттан-саҥа ньымаларын билиһиннэрдилэр.
«Национальнай медицинскэй балаата» сойуус президенэ, уһулуччулаах хирург Леонид Рошаль:
«Медицина уопсастыбата маннык улахан тэрээһиҥҥэ аан бастаан бииргэ муһунна. Кистэл буолбатах, биһиги салаабыт өр кэм устата кириисискэ киирбитэ. Кэнники кэмнэргэ балаһыанньа уларыйда. Ол гынан баран, дойдубут нэһилиэнньэтигэр уонна эмчиттэргэ бэйэлэригэр билиҥҥи систиэмэҕэ туһаайыллар боппуруостар тураллар, кыһалҕалар бааллар. Ону барытын бииргэ быһаарар соруктаах кэлэн олоробут», – диэн, бу тэрээһин элбэҕи эрэйэр кыахтааҕын бэлиэтээтэ.
Надежда ЕГОРОВА, «Саха сирэ» хаһыат, edersaas.ru