СӨ бырабыыталыстыбатын бэрэссэдээтэлин бастакы солбуйааччы Алексей Колодезников Өлүөнэ өрүһү куттала суох туорааһыны хааччыйыыга ыксаллаах быһыы-майгы хамыыһыйатын (КЧС) мунньаҕын тэрийэн ыытта.
Бүгүн социальнай ситиминэн Дьокуускай –Аллараа Бэстээх өрүһү туоруурга көҥүллэнэ илик суолунан, быраабыланы кэһэн туран, биир массыына ГАИ үлэһитин түҥнэри көппүт видеота тарҕаммыта. Бу мунньахха ГИБДД сотруднига ол массыына суоппара быһаарыллан, дьыала силиэстийэлиир кэмитиэккэ ыытыллыбытын иһитиннэрдэ.
Алексей Колодезников Аллараа Бэстээх өттүттэн суолу сабарга, Дьокуускайтан өрүскэ тахсыы суолларыгар көһөрүллэ сылдьар видеокамералары туруорарга, ДПС, МЧС хонтуруолга ыларыгар, дьуһуурустубаны олохтууругар сорудахтаата. Ону сэргэ, иһитиннэрэр-биллэрэр маассабай сириэстибэлэр уонна социальнай ситим өрүһү туоруур билигин бобуулааҕын, күннэтэ муус халыҥа төһөҕө тиийбитин, административнай ыстарааптар тустарынан тиһиктээхтик иһитиннэрэ туралларыгар эттэ. ГИМС, ДПС, Дьокуускай куорат уонна Мэҥэ Хаҥалас улууһун дьаһалталара бииргэ үлэлииллэрин модьуйда.
Ньургуйаана ИВАНОВА, «Саха сирэ» хаһыат, edersaas.ru
Хаартыска yakutia.info