Ардах түһэн, Өлүөнэ, Алдан, Яна, Өлүөхүмэ өрүстэргэ “иккис долгун” кэлэн, уу таһыма 5-30 см үрдээтэ, сорох намыһах сиринэн хонууларга тахсыан сөп. Бу туһунан өрөспүүбүлүкэтээҕи суһал ыстаап брифинигэр СӨ Нэһилиэнньэ олоҕор куттала суох буолууну хааччыйар судаарыстыбаннай кэмитиэтин бэрэссэдээтэлин солбуйааччы Иннокентий Андросов иһитиннэрдэ.
Бу күннэргэ үгүс улуустарга ардах түстэ. Онон үрэхтэр, кыра өрүстэр уулара туолан турар. Бу көмүөл мууһа барбытын кэннэ, “хара уу” кэлиитэ сыл аайы хатыланар көстүү.
Оттон Халыма өрүскэ уу таһыма Зырянка бөһүөлэгин аттынан 10 см кэриҥэ түстэ.
—Бэс ыйын 2 күнүгэр сарсыарда 8 чаастааҕы туругунан, Усуйаана оройуонугар Усть-Янск сэлиэнньэтин аттынан уу таһыма 6 см түстэ. Түүн 907 см тиийэ сылдьыбыта, муҥутуур кээмэйэ – 1023 см. – диэн Иннокентий Андросов бэлиэтээтэ.
Уопсайынан ыллахха, Саха сирин өрүстэригэр муус устуута холкутук, хаһаайыстыбаҕа улахан ыксалы үөскэппэккэ, ааһан эрэр. Хотугу өрүстэргэ көмүөл мууһа устан бүтэн, муораҕа тахсан эрэр.
Ангелина Васильева, “Саха сирэ” хаһыат, edersaas.ru
Хаартыска: sakhagov.ru