Өрөспүүбүлүкэ бу нэдиэлэтээҕи сүрүн сонуннарын билиһиннэрэбит:
edersaas.ru
Ил Дархан Айсен Николаев муус устар 17 күнүттэн Чайыҥдатааҕы ньиэп-гаас баайдаах сиргэ карантин биллэрдэ. Баахтабай бөһүөлэккэ эпидемиологическай балаһыанньа кытаатта. Хас да киһи коронавируһунан ыарыйда. Онон бөһүөлэккэ киирии-тахсыы бобулунна.
Онтон өрөспүүбүлүкэҕэ уопсай туругу ылан көрдөххө, барыта 47 киһи ыалдьыбытыттан 15 киһи үтүөрбүт. Билигин 32 киһи өрөспүүбүлүкэ балыыһаларыгар эмтэнэр.
Эпидемиологическай балаһыанньанан сибээстээн, быйыл үөрэххэ улахан уларыйыы таҕыста.
СӨ Үөрэҕин уонна наукатын министиэристибэтин пресс-сулууспата иһитиннэрбитинэн, РФ наукаҕа уонна үрдүк үөрэххэ министиэристибэтин бирикээһигэр олоҕуран, дойду бары үрдүк үөрэҕин кыһаларыгар, ол иһигэр Саха сиригэр докумуону тутуу бэс ыйын 20 күнүттэн саҕаланыаҕа.
Быйылгыттан колледжка, техникумҥа туттарсааччылар докумуоннарын электроннай ньыманан ыытыахтара Сайабылыанньаны СӨ үөрэҕин порталын нөҥүө электроннай ньыманан, “Е-Услуги. Образование” систиэмэнэн ылыаҕа.
9-с кылаастар экзээмэннэрин бэс ыйын 8 күнүттэн ыытары былаанныыллар Үөрэҕи уонна науканы кэтээн көрөр федеральнай киин саайтыгар быйылгы 9-с кылаастар эксээмэннэрин бэс ыйын 8 саҕалаан ыытары былаанныылларын туһунан иһитиннэрбиттэр.
Ил Дархан Айсен Николаев итиэннэ Саха сиринээҕи уонна Өлүөнэтээҕи архиепископ Владыка Роман коронавирус дьаҥа тарҕаныытын бохсор инниттэн, өрөспүүбүлүкэ олохтоохторун Паасха кэмигэр дьиэҕэ олорорго сүбэлээлииллэр. Онон Паасхатааҕы таҥара сулууспатын дьиэҕэ олорон, быһа эфиргэ «Якутия 24» , «Саха» НКИХ, «Якутия 24» сайтыгар, Саха сиринээҕи Епархия инстаграмыгар көрүөххэ сөп. Онлайн-биэрии муус устар 18 күнүгэр, Улуу Субуотаҕа, буолар.
Эһиги эдэр саас сайтка тахсыбыт өрөспүүбүлүкэ сүрүн сонуннарын иһиттигит