Өрөспүүбүлүкэтээҕи үһүс нүөмэрдээх балыыһа быраастара Аммаҕа, Уус Маайаҕа үлэлээтилэр
Бу күннэргэ 3-с нүөмэрдээх өрөспүүбүлүкэтээҕи килиниическэй балыыһа кылаабынай бырааһын солбуйааччыта Вера Тарасова салайааччылаах дэлэгээссийэ Амма, Уус Маайа улуустарыгар сырытта.
Оробуочай сырыы кэмигэр балыыһа быраастара улуустааҕы кэллиэгэлэригэр фармакотерапияҕа, предиктивнай терапияҕа тэрийэр-мэтэдиичэскэй көмө оҥордулар.
Өрөспүүбүлүкэтээҕи үһүс нүөмэрдээх балыыһа иһинэн баар предиктивнай мэдиссиинэ уонна биоинформатика киинин сэбиэдиссэйэ Александра Асекритова иһитиннэрбитинэн, көһө сылдьар биригээдэ олохтоохторго сүбэ-ама биэрбиттэр.
Сырыы түмүгүнэн Амматааҕы киин балыыһаҕа антикоагулянтнай кэбиниэти тэрийэр туһунан быһаарыллыбыт.
Маны таһынан «Персонализированная медицина в первичном звене» бырайыагынан бииргэ үлэлээһиигэ кэпсэттилэр. Бииргэ үлэлээһиҥҥэ олоҕуран балыыһа исписэлиистэрэ практическай сэминээрдэри ыытыахтара, Амма, Уус Маайа улуустарын олохтоохторугар санитарнай-сырдатар үлэни ыытыахтара.
edersaas.ru