Бу нэдиэлэҕэ 2-с №-дээх Өрөспүүбүлүкэтээҕи балыыһаҕа-Суһал мэдиссиинискэй көмө киинигэр саҥа анал тэриллэр кэллилэр диэн доруобуйа харыстабылын министиэристибэтин пресс-сулууспата иһитиннэрэр.
Ол курдук, анестезиология-реанимация салаатыгар саҥа 5 ИВЛ аппарааты, орон аттыгар турар 9 мониторы, 8 инфузионнай носуоһу (тымырга эми биэрэргэ аналлаах) туруордулар.
Бу салааҕа саамай ыарахан туруктаах ыарыһахтар киирэллэр, кинилэргэ суһал көмө оҥоһуллара ирдэнэр. Реанимация уонна интенсивнэй терапия палаталардаах анестезиология-реанимация отделениетын миэдиктэрэ араас хайысхалаах суһал дьон тыынын быыһыыр дьайыылары оҥороллор, эпэрээссийэҕэ анаан анестезиялаан бэлэмнииллэр. Ону тэҥэ, эпэрээссийэ иннинэ уонна кэнниттэн ыарыһах туругун кэтээн көрөллөр, эмтииллэр. Отделение 24 куойкалаах, 7 палаталаах.
Онон, киһи олоҕун быыһыырга, былдьаһыктаах түгэннэргэ маннык аныгы тэриллэр оруоллара улахан.
Ангелина Васильева, “Саха сирэ” хаһыат, edersaas.ru