Маны аах Уопсастыба Успуорт

Өрөспүүбүлүкэтээҕи «Аҕа күрэҕэ — 2021» Мэҥэ Хаҥаласка ыытылла турар

Мэҥэ Хаҥалас улууһун I-кы Наахара нэһилиэгэр Дьигдьи күөлүгэр өрөспүүбүлүкэтээҕи аҕалар уонна уолаттар күрэхтэрин бастакы күнэ түмүктэннэ. Бу туһунан СӨ Үлэҕэ уонна социальнай сайдыыга министиэристибэтэ иһитиннэрдэ.

Быйылгы  «Аҕа күрэҕэр» араас улуустартан элбэх хамаанда кытынна.  Ол курдук 18 улуустан 22 хамаанда бастыыр иһин илин-кэлин түсүһэллэр.

Күрэх санитарнай ирдэбили тутуһуллан ыытыллар. Кыттааччылар бары ыспыраапкалаахтар. Харыстанар мааскаларын кэтэ сылдьаллар.

Күрэх аһыллыытыгар хамаандалар национальнай таҥастаах улуустарын былааҕын туппутунан хааман киирдилэр.

Кытааччылары СӨ үлэҕэ уонна социальнай сайдыыга миниистирин солбуйааччы А. В. Постников эҕэрдэлээтэ уонна «Аҕа күрэҕэ — 2019» кыайыылааҕа Вячеслав Соколовка туһааннаах күрэҕи сайыннарыыга кылаатын иһин махтал суругу туттарда.

Миниистири солбуйааччы «Аҕа күрэҕин» ыытыыга муниципальнай тэриллиилэр истэригэр анал куонкуруһу ыыппыттарын туһунан иһитиннэрдэ. Ол курдук сүүмэрдиир күрэҕи үрдүк таһымнаахтык ыыппыт Чурапчы улууһугар сүрүн бириис — тэлэбиисэр туттарылынна.

Күрэх бастакы күнүгэр кыттааччылар үс түһүмэххэ кииристилэр. Оттон кыайыылаах хамаандаҕа бүгүн сүрүн бириис быһыытынан —  Квадроцикл туттарыллыаҕа.

edersaas.ru

Хаартыска: https://mintrud.sakha.gov.ru

0
0