Өрөспүүбүлүкэтээҕи 2 №-дээх балыыһа кылаабынай бырааһа: «Билигин куойка ахсаана тиийэ...
Олох-дьаһах

Өрөспүүбүлүкэтээҕи 2 №-дээх балыыһа кылаабынай бырааһа: «Билигин куойка ахсаана тиийэр»

Өрөспүүбүлүкэтээҕи 2 №-дээх балыыһа — мэдиссиинэ суһал көмөтүн оҥорор киин кылаабынай бырааһа Иван Иванов стационарга араас ыарыылаах 400 киһи баарын туһунан ЯкутияDaily кэрэспэдьиэнигэр иһитиннэрдэ.

Стационар 495 ыарыһаҕы ылар кыахтаах. Былааннаах ыарыһахтары көрүү быстах кэмҥэ хааччахтаммыта эрээри, бу күннэргэ сорох ыарыһахтары көрүү саҕаланна. Инфекционнай отделениеҕа араас диагнозтаах ыарыһахтары таһынан, туспа араарыллыбыт 80 куойкаҕа коронавирустаах ыарыһахтар эмтэнэллэр. Провизорнай салааҕа коронавируска уорбаланар — пневмониялаах, үрдүк кыраадыстаах уонна ОРВИ сибикилээх ыарыһахтар сыталлар диэбит.

Алтынньы 15 күнүнээҕи дааннайынан, провизорнайга 84 киһи сытар. Манна киирээччилэртэн анаалыс тута ылыллар, компьютернай томография оҥоһуллар. Алтынньы 16 күнүнээҕи иһитиннэриинэн, өрөспүүбүлүкэтээҕи 2 №-дээх балыыһаҕа 61 коронавирустаах киһи сытар. Билигин куойка ахсаанын элбэтии туһунан боппуруос көрүллэр. Анаалыһы тургутуу болдьоҕо 3-4 күн буолар. Ол гынан баран, компьютернай томография түмүгэр тыҥа улаханнык эмсэҕэлээбитэ көһүннэҕинэ, эмтээһин анаалыс түмүгүн кэтэспэккэ, тута саҕаланар.

— Балыыһаҕа лабораторияны саҥардыы үлэтэ бара турар. Сэтинньиттэн саҕалаан коронавируска ПЦР анаалыһын ылыыны саҕалыахпыт, онуоха аналлаах тэрил баар, үлэһит тиийэр. Быйыл балыыһа түөрт ИВЛ аппарааттанна, ону сэргэ эппэрээссийэ кэмигэр тыынарга көмөлөһөр аппараат баар. 2017 ыарыһахтары быыһыыр ЭКСМО аппраат атыылаһыллыбыта. Бу тэрил ыарахан туруктаахтарга туһаныллар, —  диир Иван Иванов.

0
0

Сайт матырыйаалларын ааптар көҥүлэ суох ылар бобуллар.

Ваш адрес email не будет опубликован.

один + 6 =