Өрөспүүбүлүкэ таһыттан киирэр бородууксуйа хаачыстыбата бэрэбиэркэлэниэхтээх
Таатта улууһугар тахсыбыт быһылаан кэнниттэн, антисептигы атыылааһын миэрэтэ кытаатыа дуо диэн быһа сибээс кэмигэр Ил Дархантан ыйыттылар.
edersaas.ru
“Биллэн турар, дьулаан алдьархай таҕыста, Таатта улууһугар дьон өллө. Бастатан туран, антисептик ити баартыйатын биһиги өрөспүүбүлүкэбитигэр эрэ буолбакка, бүтүн дойду үрдүнэн атыыттан уһуллулар. Бу антисептигы оҥорон таһаарыынан дьарыктаммыт Свердловскай уобаласка баар сыаҕы быһаардылар. Өрөспүүбүлүкэ суругунан, сыах сабылынна, холуобунай дьыала көбүтүлүннэ. Бу антисептигы оҥорбут дьон эппиэтинэскэ тардыллалларыгар эрэнэбин” – диэн эттэ.
Ону тэҥэ, тустаах сириэстибэ антисептик даҕаны ирдэбилигэр эппиэттээбэтин иһитиннэрдэ. Роспотребнадзор бу чааһыгар үлэлиирин, Саха сиригэр инникитин маннык дьулаан алдьархай тахсыбатыгар эрэнэрин эттэ. Өрөспүүбүлүкэ тас өттүттэн киирэр бородууксуйа хаачыстыбата бэрэбиэркэлэниэхтээҕин ыйда.
Людмила ПОПОВА, “Саха сирэ” хаһыат, edersaas.ru