Өрөспүүбүлүкэҕэ көтөн кэлбит гражданнары Дьокуускай аэропордугар коронавируска бэрэбиэркэлээһин күннэтэ ыытылла турар.
Бүгүн, тохсунньу 21 күнүгэр, тиэст нөҥүө 187 киһи ааста, диэн “Дьокуускай” аэропорт пресс-сулууспата иһитиннэрэр.
«Бүгүн Москваттан үс рейс кэлбит (биир рейс «Якутия» АК, икки рейс С7). Баҕа өттүнэн коронавируска анаалыһы барыта 187 киһи ааспыт, кинилэртэн биэс киһи ыалдьыбытын көрдөрдө” — диэн пресс-сулууспа иһитиннэриитигэр этиллэр.
Чинчийиини Дьокуускай куорат 2 №- дээх балыыһатын үлэһиттэрэ ыыталлар. Саха сирин таһыттан кэлэр пассажирдар бары босхо, баҕа өттүнэн тиэстэри оҥотторуохтарын сөп.
Аэровокзал күүтэр хосторугар уонна таһаҕаһы биэрэр саалаҕа тохтоло суох дезинфекция ыыталлар. «Дьокуускай» аэропорт иһигэр булгуччу мааска кэтии эрэсиимэ тутуһуллар, киириигэ эт-сиин сылааһа хас биирдии киһиттэн ылыллар.
«Саха сирэ» хаһыат, edersaas.ru
Хаартыска sakha.gov.ru