Өрөспүүбүлүкэ 2032 сылга диэри сайдыытын стратегията Ил Түмэн төрдүс уочараттаах пленарнай мунньаҕар бигэргэннэ. Дьокутааттар докумуон барылын бүтэһиктээх ааҕыынан ылыннылар.
Стратегия барылын бастакы вице-премьер Алексей Стручков билиһиннэрдэ. Бу стратегияҕа Саха сирин экэниэмикэтин бары хайысхаларыгар сайдыы суола торумнанна. Бу мантан сиэттэрэн судаарыстыбаннай бырагыраамалар таҥыллан тахсыахтаахтар. Санатан эттэххэ, 2032 сылга диэри сайдыы стратегиятын оҥоруу икки сылтан бэттэх күүскэ барда. Бу сайын Айсен Николаев улуустар стратегияларын көрүүгэ мунньахтары ыытан, этиилэри истибитэ. Онон бу стратегияҕа улуустар сайдыылара эмиэ барыта түмүлүннэ.
Кэрэхсэбиллээҕэ баар, бу докумуону оҥорууга эдэр дьон хото кытыннылар. Ол курдук, Ыччат бырабыыталыстыбата, өрөспүүбүлүкэ эдэр экэнэмиистэрин ассоциацията, Наука Аччыгый академията, Хотугулуу-Илиҥҥи федеральнай университет төһүү күүс буоллулар.
Стратегия бырайыага оҥоһуллан, РФ экэниэмикэтин министиэристибэтигэр сөбүлэһиннэриигэ барбыта. Министиэристибэ туһааннаах биэдэмистибэлэргэ ыытан сыл курдук бэрэбиэркэлэппитэ. Ол түмүгэ былырыын ыам ыйын 17 күнүгэр кэлбитэ.
“Бу стратегия биир эрэ сыллаах үлэ буолбатах. Манна хас эмэ сылы быһа уопсастыбаннас, туһааннаах биэдэмистибэлэр, эспиэрдэр үлэлээтилэр. Хас биирдии улууска ырытыһыы, дьүүллэһии буолбута. Ол түмүгэр барыта 1042 этии киирбитэ, итинтэн 527-тэ — улуустартан. Ил Дархан Инвестиционнай Анал этиитигэр олоҕуран, хас биирдии бырайыакка эппиэтинэстээх дьоннор ананыахтара”, — диэн бэлиэтиир Алексей Александрович.
Аграфена КУЗЬМИНА, “Саха сирэ” хаһыат, edersaas.ru