Ил Түмэҥҥэ киирэр сокуон барыллара икки судаарыстыбаннай тылларынан, сахалыы уонна нууччалыы, тэҥҥэ оҥоһуллан киирэр буолуохтара. Бүгүн Ил Түмэн уочараттаах XXXVII пленарнай мунньаҕар норуот дьокутааттара Конституционнай сокуоннарга туһааннаах уларытыылары киллэриини бастакы ааҕыытынан ылыннылар.
Саха сирин сокуоннара сахалыы уонна нууччалыы оҥоһуллуохтаахтарын туһунан Ил Дархан Айсен Николаев эрдэ этэн турар. Кини этиитинэн сокуон барыла оҥоһуллан норуот дьокутааттарын көрүүтүгэр киирбитэ.
СӨ Ил Дарханын уонна бырабыыталыстыбатын дьаһалтатын салайааччыта Георгий Михайлов иһитиннэрбитинэн, Конституционнай сокуоннарга туһааннаах уларытыылары киллэрэргэ эһиилгиттэн саҕалаан 5,6 мөлүйүөн солкуобай ирдэниллэр.
– Өрөспүүбүлүкэ сокуоннара икки тылынан, нууччалыы уонна сахалыы, тахсалларын туһунан өссө 1923 сыллаахха ахсынньыга судаарыстыбаннаспытын төрүттэспит биир тумус туттар киһибит Исидор Барахов этэн турар. Онон биһиги Өрөспүүбүлүкэбит 100 сылын көрсө Конституционнай сокуоннарбытыгар маннык уларытыылары киллэрэрбит историческай суолталаах уонна төрөөбүт төрүт тылбытын сайыннарарбытыгар биир улахан хардыы буолар. Конституционнай сокуоннарга туһааннаах уларыйыылар киирдэхтэринэ, 2023 сылтан саҕалаан СӨ бүддьүөтүттэн 5,6 мөлүйүөн солкуобай сыл аайы көрүллэр буолуоҕа, – диэн иһитиннэрэр.
Манна сыһыаран эттэххэ, Арассыыйа эрэгийиэннэригэр Татарстаҥҥа уонна Тываҕа өрөспүүбүлүкэтээҕи сокуоннарын икки тылынан таһаара олороллор. Ил Түмэн бүгүҥҥү мунньаҕар норуот дьокутааттара сокуон барылын бастакы ааҕыынан ылыннылар.
Аграфена КУЗЬМИНА