Өрөспүүбүлүкэ сиригэр-уотугар оту күүскэ бэлэмниир сорук турар.
Маныаха окко мобильнай биригээдэлэри элбэтэллэр. Маны сэргэ, төһө комбикорма тиийбэтин көрөн, Амур уобалаһыттан аҕалыахтара. Ол гынан баран, от ордук улахан болҕомтоҕо ылыллар. Өрөспүүбүлүкэ сиригэр оттоон баран, ону айлҕа содулуттан харгыстаммыт оройуоннарга тарҕатыы сорук быһыытынан туруорулунна. Бу туһунан бүгүн СӨ Бырабыыталыстыба бэрэссэдээтэлэ Андрей Тарасенко улуустар баһылыктарын кытары мунньахха эттэ.
СӨ Тыа хаһаайыстыбатын миниистирэ Александр Атласов иһитиннэрбитинэн, быйылгы сылга окко былаан 457,5 тыһ.туонна, ити былырыыҥҥы сылы кытары тэҥнээтэххэ 2% кыра, сиилэс — 26 867 туонна, сенаж — 14 766 туонна. Сүөһү аһылыгын бэлэмнээһиҥҥэ кураан уонна улуустарга буола турар ойуур баһаардара кыһалҕаны үөскэтэллэр.
«Бэс ыйын иккис аҥаарыттан 11 оройуоҥҥа күн-дьыл туругуттан от кыайан үүммэтэ. Итинтэн үс оройуоҥҥа кураан бэлиэтэммитэ, бу Нам, Өлүөхүмэ, Томпо улуустара. Ону сэргэ, ойуур баһаардарыттан хоромньу баар. Сылгы баазаларыттан уонна бүтэйдэртэн ураты, уот 464 туонна былырыыҥҥы оту, 730 га үүммүт оту, 3 тыһ. га мэччирэҥ сири сиэбит», — диир Атласов.
Оройуоннар өртүлэриттэн чопчулааһыннарынан оту бэлэмнээһин 364,5 тыһ. туонна, былаантан 20% кыра.
«Бүгүн биһиги биһиги оройуоннар баһылыктарын кытары сүөһү аһылыгын бэлэмнээһин хампаанньатын кэпсэттибит. Сүөһү ахсаанын кыччаппат сорук турар. Окко былааннарыгар ыарахаттары көрсөр оройуоннары иһиттибит. Ону сэргэ, үчүгэй ыһыы сирдэрдээх хаалбыт, тиийбэт отунан көмөлөһүөн сөптөөх оройуоннары ыҥыран кытыннардыбыт. Ил Дархан Айсен Николаев сорудаҕынан мобильнай биригээдэлэр элбэтиллэллэр, ону сэргэ, быйыл төһө комбикорма тиийбэтэ Амур уобалаһыттан аҕалыллар. Ыаллыы эрэгийиэни кытары дуогабар баар. Ол гынан баран, өрөспүүбүлүкэ иһигэр, кыах баарынан оройуоннарга оттуурга сүрүн сорук турар. Биһиги судаарыстыбаттан өйөбүл уонна хас биирдиилэригэр компенсация оҥоһулларын туһуттан, улуустар баһылыктарыттан сирдэригэр-уоттарыгар хайдах уонна төһө хаһаайыстыбалаахтарын туһунан толору иһитиннэриини биэрэллэригэр көрдөстүбүт», — диэн Андрей Тарасенко иһитиннэрдэ.
Маныаха, арыый элбэҕи оттуон сөптөөх оройуонунан соҕотох Кэбээйи буолла. Онно 18 тыһ. туоннаттан тахса оту бэлэмниир соруктаахтар, бу быылаантан 2850 туоннанан элбэх. Чорбох от Чурапчыга, Уус Алдаҥҥа уонна Мэҥэ Хаҥаласка бэриллиэхтээх.
Бэлиэтээн эттэххэ, Саха сирин премьерэ ааспыт нэдиэлэҕэ Амур уобалаһын кытары кэпсэтии ыытан турар. Онон Амур уобалаһын 33 хаһаайыстыбалаах субъега 13 650 туонна оту Саха сирин хаһаайыстыбаларыгар ыытарга бэлэмнииргэ соруналлар. Маны сэргэ, Чурапчы улууһун хаһаайыстыбалара Зейскэй оройуоҥҥа 2400 туонна оту отуур былааннаахтар.