Айылҕа харыстабыла Маны аах

Тоҕус улууска 12 ойуур баһаарын умуллараллар

Бүгүн, бэс ыйын 12 күнүгэр, суһал ыстаап ойуур баһаардарыгар туһуламмыт мунньаҕар СӨ Бырабыыталыстыбатын бэрэссэдээтэлин бастакы солбуйааччы Дмитрий Садовников кытынна.
Тоҕус оройуоҥҥа 12 ойуур баһаарын умулларыыга үлэ ыытылларын иһитиннэрдилэр. Уот 3039 га иэннээх сири хаппыт. Ааспыт сууккаҕа түөрт оройуоҥҥа 870 га иэннээх сиринэн тайаабыт биэс ойуур баһаара бохсулунна. Бу Кэбээйи, Ньурба, Хаҥалас уонна Мэҥэ Хаҥалас улуустарыгар. 3049 га иэннээх сири хаппыт тоҕус баһаар умулларылынна. Ол гынан баран, ааспыт хонукка эбии икки баһаар булулунна. Олору умулларыыга үлэ ыытыллар.
Ньурба оройуонугар — икки, Сунтаар, Томпо, Уус Маайа, Үөһээ Бүлүү улуустарыгар биирдии ойуур баһаардара бэлиэтэнэллэр. Нэһилиэнньэлээх пууннарга куттал суоһаабат. Уоту умулларыыга үлэ салҕанар.

Баһаары умулларыыга 1 122 киһи үлэлиир, 140 тиэхиньикэ туһаныллар. Авиация үлэтин былаанынан бүгүҥҥү күҥҥэ 18 салгын аала үлэлиир. Итинтэн 13 көтөр аал 19 оройуоҥҥа уонна Дьокуускай куоракка ботурууллуур, биэс бөртөлүөт  ойуур баһаардарын умулларыга үлэлиир дьону  таһар, ГСМ уонна ас-үөл тиэрдэр.

Дмитрий Садовников Ленскэй, Сунтаар, Үөһээ Бүлүү, Кэбээйи, Томпо, Мэҥэ Хаҥалас, Уус Маайа уонна Хаҥалас улуустарын бэрэстэбиитэллэрин дакылааттарын иһиттэ. Онно этиллибитинэн Өлүөнэ очуостарын тыатыгар баһаар бохсуллубут. Томпоҕо биир баһаар бохсуллубут. Хаандыга бөһүөлэгиттэн балтараа км тэйиччи уот көрдүгэнин булбуттар. Дронунан чинчийэн көрүү ыытыллыбыт. Итиннэ баһаары умулларарга баһаарынайдары уонна быыһааччылары ыытарга быһаарбыттар. Ууну кутар тэриллээх ЫБММ бөртөлүөтэ Хаандыгаҕа баар.

Уочараттаах мунньаҕы түмүктүүрүгэр, бырабыыталыстыба бэрэссэдээтэлин бастакы солбуйааччы Дмитрий Садовников, ойуур баһаардара сүрүннээн дьон дьалаҕай сыһыаныттан тахсыбыттарынан, нэһилиэнньэҕэ өйдөтөр үлэни күүһүрдэллэрин ирдээтэ.

0
0