Уопсастыба

Өрөспүүбүлүкэ сайдыытыгар биир дойдулаахтарбыт уонна түмсүүлэр оруоллара

Тас дойдуларга, Арассыыйа атын эрэгийиэннэригэр Саха сириттэн төрүттээх-уустаах уонунан тыһыынча киһи олороро бэлиэтэнэр.

Кинилэртэн үксүлэрэ Саха сиригэр өр олорбут дьон, эбэтэр үрдүк үөрэҕи тас дойдуга, Арассыыйа куораттарыгар бүтэрэн баран үлэлии хаалбыт ыччаттар диэн этиллэр. Төрөөбүт сирдэриттэн-уоттарыттан ыраах тэлэһийбит киһи үксэ тапталлаах Сахатын сирин кытары сибээһи тутар, эрэгийиэн социальнай-култуурунай сайдыытыгар тиһиктээхтик кыттар уонна инникитин да үлэлэһэр баҕалаах. Маныаха ыраах тэлэһийбит биир дойдулаахтарбытын, диаспоралары өрөспүүбүлүкэ социальнай-экэнэмиичэскэй сайдыытыгар күүскэ кытыннарар туһунан боппуруоһу сүбэ мунньахха көрдүлэр.
Ил Дархан Айсен Николаев Саха сириттэн ыраах баран олохсуйбут дьон эрэгийиэн сайдыытыгар ис сүрэхтэриттэн кыттар, көмөлөһөр, араас хайысхаларга үөрүйэхтэрин, билиилэрин-көрүүлэрин үллэстэр баҕалаахтарын бэлиэтээтэ. Кинилэр ортолоругар улахан корпорацияларга үлэлиир, урбаанынан дьарыктанар, дьоһун тэрилтэлэргэ сүрүннүүр исписэлиистэр баалларын, бу дьон үлэлэригэр үөрүйэхтэрэ, билиилэрэ-көрүүлэрэ өрөспүүбүлүкэ сайдыытыгар экэнэмиичэскэй боппуруостары быһаарыыга наада буоларын ыйда.
«Өскөтүн урукку өттүгэр биһиги биир дойдулаахтарбытын өрөспүүбүлүкэҕэ биллэн турар олус суолталаах култуура, гуманитарнай бииргэ үлэлэһии боппуруостарынан тардар, алтыһар эбит буоллахпытына, билигин кинилэр билиилэрин-көрүүлэрин экэниэмикэ сайдыытыгар туһанарга ордук ууруохтаахпыт. Маныаха өрөспүүбүлүкэ министиэристибэлэрин, биэдэмистибэлэрин уопсастыбаннай түмсүүлэригэр, тэрилтэлэр, хампаанньалар дириэктэрдэрин сэбиэтигэр тардарга  усулуобуйа баар«, — диэтэ Ил Дархан.
«Якутия» венчурнай хампаанньа» АУо холобуругар сүбэ мунньах кыттыылаахтара өрөспүүбүлүкэ социальнай-экэнэмиичэскэй сайдыытын боппуруостарыгар салгыы үлэлэһэргэ биир дойдулаахтары тардыы ситиһиилээх өрүтүн көрдүлэр. Хампаанньа генеральнай дириэктэрэ Василий Ефимов диаспоралар Саха сирин имиджин өрөспүүбүлүкэ таһыгар таһаарарга бэрэстэбиитэл кэриэтэ буолуохтаахтарын бэлиэтээтэ. Хампаанньа үлэтин хайысхатынан тас дойдуга, өрөспүүбүлүкэ таһыгар Саха сириттэн төрүттээх дьону-сэргэни кытары ыкса сибээһи тутарын иһитиннэрдэ. Кинилэр билиилэрэ-көрүүлэрэ, үөрүйэхтэрэ үлэни саҥа саҕалыырга ордук көмөлөөҕүн, сүбэлэрэ наадатын ыйда.
СӨ Тас сибээскэ уонна норуоттар дьыалаларыгар миниистир Гаврил Кириллин Ил Дархан Айсен Николаев Ил Түмэҥҥэ туһаайан этиитигэр, биир дойдулаахтарбытын кытары сибээһи чиҥэттэхпитинэ, Саха сирин кытары аан дойдуга бигэ далаһа уурулларын туһунан этиитин диаспоралар улаханнык биһирээбиттэрин эттэ. Мунньах кыттыылаахтара төрөөбүт сирдэриттэн-уоттарыттан тэйэн ыраах олорор дойдулаахтарбыт сүрүннүүр сэбиэт курдук, тутулуга суох орган тэринэргэ этии киллэрэллэрин бэлиэтээтилэр. «Бу кинилэр Саха сирин кытары быстыспат ситимнээхтэрин, төрөөбүт дойдулара салгыы сайдарыгар баҕалаахтарын көрдөрөр«, — диэтилэр.
Сүбэ мунньах түмүгүнэн Айсен Николаев бу үлэҕэ сүрүн соругунан экэниэмикэ, үп-харчы, социальнай эйгэ хайысхаларыгар өрөспүүбүлүкэлэрин сайдыытыгар кыттар баҕалаах биир дойдулаахтары хабыыны өссө кэҥэтии сүрүн соругунан буоларын бэлиэтээтэ.

Андрей Сорокин (СИА) хаартыскаҕа түһэриитэ.

1
0

Добавить комментарий