Өрөспүүбүлүкэ бу нэдиэлэтээҕи сүрүн сонуннарын билиһиннэрэбит:
Муус устар 24 күнүнээҕи туругунан Саха сиригэр өссө сэттэ киһи коронавируһунан ыалдьыбыта билиннэ. Өймөкөөн улууһугар биир киһи дьаҥҥа сутуллубута бигэргэннэ.
Саха сиригэр үрдүк бэлэмнээх буолуу режима саҕаланыаҕыттан, кулун тутар 17 күнүттэн, 40 сымыйа сонун тарҕаммыта биллэр. Мантан Уон киһи административнай эппиэтинэскэ тардылынна. Кинилэр 15 тыһыынчаттан 30 тыһыынча солкуобайга тиийэ ыстараап төлүөхтэрэ.
Санитарнай-эпидемиологическай балаһыанньанан сибээстээн, 9-с кылаастар эксээмэннэрин үөрэммит оскуолаларыгар ыытыахтарын сөп. Бу туһунан РФ Үөрэҕириигэ министиэристибэтин пресс-сулууспата суруйар. Ол гынан баран бу 11-с кылаастар туттарар биир кэлим эксээмэннэригэр туох даҕаны сыһыана суох диэн быһаараллар.
РФ бырабыыталыстыбата «суһал көмө» массыыналарынан эрэгийиэннэри хааччыйыаҕа. Мантан 11 массыына Саха сиригэр кэлиэхтээх. Онон сотору кэминэн «Форд Соллерс Елабуга», «ГАЗ» уонна Ульяновскайдааҕы автомобильнай собуоттар массыыналара кэлиэхтэрэ.
Өрөспүүбүлүкэ волонтердарын куорпуһа биир кэмнээх босхо ас-үөл нобуорун биэрэргэ 65-тээх уонна онтон аҕа саастаах дьон испииһэгин оҥорор. Маннык көмө Дьокуускай куоракка, Жатай бөһүөлэгэр итиэннэ Алдаҥҥа, Бүлүүгэ, Горнайга, Ленскэйгэ уонна Сунтаарга оҥоһуллар.
Дьокуускайдааҕы гидрометкиин чахчыларынан, муус устар 24 күнүнээҕи туругунан, Өлүөнэ өрүс мууһун аллараа кытыыта Иркутскай уобалаһынан устар. Саха сирин кыраныыссатыттан 400 км сиргэ. Витим — Пеледуй хайысхатынан муус устар 26-27 күннэригэр устара сабаҕаланар.
edersaas.ru