Өрөспүүбүлүкэ бу нэдиэлэтээҕи сүрүн сонуннарын билиһиннэрэбит:
Ыам ыйын 28 күнүгэр, Айсен Николаев Саха Өрөспүүбүлүкэтин Аҕа Баһылыгын эбээһинэһигэр киирбитэ икки сыла буолла.
Ил Дархан брифинг кэмигэр кэлэр үс күҥҥэ хааччахтыыр уонна санитарнай-эпидемиологическай дьаһаллары күүһүрдэн, ыарыы тарҕаныытын боҕустахха табыллар диэн этэ. Онон, бээтинсэҕэ тэрилтэлэр офистарын итиэннэ киин куорат дьаһалтата болуоссаттары, оҕо оонньуур былаһааккаларын, оптуобус тохтобулларын эмтииллэрэ ирдэнэр. Субуотаҕа итиэннэ өрөбүлгэ оптуобустар сырыылара тохтотуллар, маҕаһыыннар үлэлэрэ итиэннэ дьон дьаарбайыыта хааччахтанар.
Саха Өрөспүүбүлүкэтигэр 50 тыһыынчаҕа диэри ахсааннаах нэһилиэнньэлээх пууннарга, бөһүөлэктэргэ, куораттыы типтээх бөһүөлэктэргэ, куораттарга үлэлии барар учууталларга биир кэмнээх төлөбүрү ыларга кыттааччылары сүүмэрдээһин куонкуруһун түмүгэ таҕыста. Куонкуруска Арассыыйа 23 субъегыттан 124 кыттааччы докумуонун көрдүлэр. Куонкурус хамыыһыйатын быһаарыытынан, 19 вакантнай миэстэҕэ 18 кыайыылаах таҕыста.
Биир кэлим эксээмэн төһө даҕаны от ыйын 3 күнүттэн саҕаланнар, быйыл эмиэ былырыыҥҥы курдук, абитуриеннартан докумуону үрдүк уонна орто анал үөрэхтэргэ, бэс ыйын 20 күнүттэн тутан саҕалыахтара.
Ыам ыйын 27 күнүгэр, Дьокуускай куорат баһылыга Сардаана Авксентьева «Туймаада» ыһыаҕын бэлэмнээһиҥҥэ уонна ыытыыга тэрийэр кэмитиэт мунньаҕын ыытта. Ол курдук ыһыах онлайн-режимынан бэс ыйын 21 күнүгэр, Үс Хатыҥҥа Кымыс киинигэр алгыс сиэрэ-туома ыытыллыаҕа. Сиэр-туом оҥоруутун НВК “Саха” тэлэбидиэнньэ быһа биэриигэ көрдөрүөҕэ.
Дойду бэрэсидьиэнэ Владимир Путин бэс ыйын 24 күнүгэр Москваҕа уонна атын куораттарга Кыайыы параадын ыытарга сорудахтаата. Бу күн 1945 сыллаахха Москваҕа Улуу Кыайыыны уһансыбыт дьон параадтаабыттара. Онон быйыл бу күн параад буоларынан сибээстээн, өрөбүл күн оҥорору былаанныыллар.
edersaas.ru