Өрөспүүбүлүкэ сүрүн бибилэтиэкэтин өрөмүөнэ саҕаланыа

Бөлөххө киир:

САССР тэриллибитэ 100 сылынан СӨ Ил Дархана Айсен Николаев сорудаҕынан Национальнай бибилэтиэкэ өрөмүөнэ саҕаланыаҕа.

Өрөмүөн үлэтин ыытарга оҥоһуллубут симиэтэ Тутууга сыананы олохтуур эрэгийиэннээҥи кииҥҥэ экспертизаны ааста. Онон,  быйыл бибилэтиэкэ дьиэтин бастакы уонна иккис этээстэрэ, эһиил -– үһүс уонна төрдүс этээстэрэ өрөмүөннэниэхтэрэ.

«Олохтоох өрөмүөнү оҥорорго быйыл өрөспүүбүлүкэ бүддьүөтүгэр 30 мөлүйүөн солкуобай көрүлүннэ. Биллэрин курдук, бибилэтиэкэҕэ кинигэлэри харайарга сөптөөх усулуобуйа наада. Онон быйыл вентиляцияны өрөмүөннүүргэ туспа 10 мөлүйүөн солкуобай бэрилиннэ. Өрөмүөн чэрчитинэн ис тупсарыыны аахпакка туран, бибилэтиэкэ сылытар систиэмэтэ, түннүктэр, ааннар, уот ситимэ уларатыллыахтара», -– диэн СӨ Национальнай бибилэтиэкэтин дириэктэрин бастакы солбуйааччы Василий Борисов иһитиннэрдэ.

БЫҺААРЫЫ:

2021 сыллаахха Саха сиригэр «Территория книги и чтения» бочуоттаах анал аат иҥэриллибитэ. Маннык аат уонна анал бириис «Саамай ааҕар эрэгийиэн» куонкурус кыайыылааҕа буолбут уонна кэнники биэс сылга кылгас испииһэккэ үстэ киирбит эрэгийиэннэргэ туттарыллар.

Национальнай бибилиэтэкэ пуондатыгар 1,6 мөлүйүөнтэн тахса ахсааннаах кинигэ,  64 тыһыынчаттан тахса араас сыыппараҕа түһэриллибит докумуон хараллар. Бибилэтиэкэ 50 тыһыынчаттан тахса ааҕааччы наадатын хааччыйар.

Надежда ЕГОРОВА, «Саха сирэ», edersaas.ru

+1
0
+1
0
+1
0
+1
0
+1
0
+1
0
+1
0