Бүгүн, атырдьах ыйын 7 күнүгэр, Ил Дархан Айсен Николаев өрөспүүбүлүкэҕэ ойуур баһаардарынан суһал ыстаап мунньаҕын ыытта.
Өрөспүүбүлүкэ салайааччыта эрэгийиэҥҥэ быһыы-майгы уустугун бэлиэтээтэ.
«Чугастааҕы икки күҥҥэ күүстээх тыалтан өрүс уҥуоргу бөлөх улуустарыгар ойуур баһаара үөһээнэн барар куттала баар. Онтон кэлэр нэдиэлэ саҕаланыытыгар күүстээх тыал, аны, өрөспүүбүлүкэ арҕаа өттүгэр түһэрэ сабаҕаланар. Оройуон бары салалталара уонна ойуур баһаарын умуруорууга суһал ыстааптар салайааччылара булгуччу миэстэтигэр баар буоларгыт уонна куттал суоһуур түгэнигэр миэрэни түргэнник ыла охсоргут ирдэнэр«, — диэтэ Айсен Николаев. Маны сэргэ, Ил Дархан нэһилиэнньэҕэ суһал иһитиннэриигэ ураты болҕомтону ууралларыгар эттэ.
Бэҕэһээ Таатта улууһугар Ытык Күөл сэлиэнньэтигэр чугаһыы сылдьыбыт ойуур баһаарыгар түүннэри СӨ Бырабыыталыстыбатын бэрэссэдээтэлин бастакы солбуйааччы Дмитрий Садовников ыытыллыбытын иһитиннэрдэ.
Бүгүн Ытык Күөлтэн куйаар ситиминэн ыытыллыбыт видеокэмпириэнсийэнэн мунньахха Дмитрий Садовников ойуур баһаардарын умуруорууга ыытылла турар үлэлэри кэпсээтэ. Вице-премьер оройуон уонна сэлиэнньэ салалталара нэһилиэнньэни баһаартан харыстааһыҥҥа улахан үлэни ыыталларын бэлиэтээтэ.
Ойуур баһаарын умуруорууга бүгүҥҥү күн туругунан 150-тан тахса киһи уонна туох баар тиэхиньикэ барыта онно үлэлииллэр. Итиннэ чугастааҕы оройуоннартан баһаарынай массыыналар көмөлөһө сылдьаллар. Сэлиэнньэҕэ уу кутар анал тэриллээх «Полярнай авиалиния» Ми-8 бөртөлүөтэ уот үөһээнэн барар түгэнигэр суһаллык көтөргө бэлэм. Садовников бүгүн улууска сөкүүндэҕэ 14 м. түргэннээх тыал түһүөхтээҕэ сабаҕаламмытынан, бары күүстэр улахан бэлэмнээхтэрин эттэ.
Айсен Николаев ойуур баһаара соһуччу үөһээнэн өрө күүдэпчилэммитин тохтоторго бары миэрэни суһаллык ылбыттарыгар, дьону уонна тиэхиньикэни түргэнник мобилизациялааһыҥҥа тэтимнээх үлэ ыытыллыбытыгар Таатта улууһун суһал ыстаабыгар, улуус уонна сэлиэнньэ баһылыктарыгар махтанна. Маны сэргэ, Ил Дархан күүһү уонна тиэхиньикэни атын нэһилиэнньэлээх пууннарга ыксаллаах балаһыанньа үөскүүр түгэнигэр көһөрө охсорго бэлэм буолалларыгар соруйда.
Мунньахха өрөспүүбүлүкэ үрдүнэн 159 ойуур баһаара буола турара этилиннэ. Бүгүн сарсыардааҥҥы иһитиннэриинэн, 64 баһаары умуруорууга үлэ ыытыллар. Онно барытыгар 3159 киһи, 438 көлө үлэлиир.
Кэнники хонукка 14 ойуур баһаара умуруоруллубут, 7 бохсуллубут, 6 саҥа баһаар булуллубут.
Ойуур баһаардарын умуруоруу туһунан Кэбээйи, Уус Алдан, Томпо, Мииринэй уонна Үөһээ Бүлүү улуустарын баһылыктара иһитиннэрдилэр.
Ил Дархан нэһилиэнньэлээх пууннар тастарыгар умайар ойуур баһаардарын ураты хонтуруолга туталларыгар соруйда. Бу Сииттэҕэ (Кэбээйи улууһа), Кырыкыйга, Далырга (Үөһээ Бүлүүгэ), Кылаайыга (Уус Алдан улууһа), Ударникка (Томпо оройуонугар) буолара бэлиэтэнэр.
Андрей Сорокин (СИА) хаартыскаҕа түһэриилэрэ
+1
+1
+1
+1
+1
+1
+1