Бүгүн, от ыйын 6 күнүгэр, СӨ нэһилиэнньэтин олоҕор-дьаһаҕар куттал суох буолуутун хааччыйар судаарыстыбаннай кэмитиэт бэрэссэдээтэлин бастакы солбуйааччы Иннокентий Андросов быһа эпииргэ таҕыста.
Быһа эпииргэ Иннокентий Андросов өрөспүүбүлүкэҕэ ойуур баһаардарын балаһыанньатын туһунан кэпсээтэ. Кини иһитиннэрбитинэн, өрөспүүбүлүкэ үрдүнэн 271 ойуур баһаара баар. Ойуур баһаара үөскүүр биричиинэтинэн кураанах этиҥнээх чаҕылҕан буолар. Иннокентий Андросов Таатта, Томпо улуустарыгар бүгүҥҥү балаһыанньаны билиһиннэрдэ. Ол курдук баһаар түмүгэр 20 уот остуолбата сууллан, нэһилиэктэр уота суох олорбуттар. Оптоволокно ситимэ умайан, улуус үрдүнэн «Мегафон» эрэ сибээһэ үлэлээбит.
Маныаха тыал хайысхата уларыйан, кыра уоттан улахан баһаар тахсыбытын эттэ. Ардаҕы аҕалыыга анал самолет үлэлээн, Томпо, Таатта улуустарыгар ардаан, баһаар арыый да намыраабыт.
Быһа эпииргэ Горнай улууһун баһылыга Никита Андреев кытынна. Кини улууска үөскээбит балаһыанньаны иһитиннэрдэ. Горнай улууһугар 21 ойуур баһаарын умулларыыга 474 киһи үлэлии сылдьарын иһитиннэрдэ. Күөрэлээххэ ЫБММ 63 байыаһа уонна 53 тиэхиньикэ үлэлиир. От ыйын 4 күнүгэр ойуур баһаара нэһилиэккэ 1,5 км чугаһыы сылдьыбыт. Тута хонтуруолга ылыллан, билиҥҥитэ ойуур баһаара 5-6 км тэйиччи сиргэ баар. Никита Андреев улуус суһал ыстаабын аатыттан вице-преьмер Дмитрий Садовниковка махталын биллэрдэ.
Ульяна Захарова, edersaas.ru