Өрөспүүбүлүкэ өрүстэринэн быйыл 3 мөлүйүөн туонна таһаҕаһы тиэйиэхтэрэ
Бэҕэһээ, ыам ыйын 7 күнүгэр, «Якутскэнерго», ОДьКХ ГУТ, «Саханефтегазсбыт», «Якутоптторг», о.д.а. улахан тэрилтэлэр ыраах улуустарга оттугу, аһы-үөлү өрүс суолунан тиэйии быйыл хайдах барыан сөбүн СӨ бырабыыталыстыбатын бэрэссэдээтэлин бастакы солбуйааччы Алексей Колодезников ыыппыт мунньаҕар кэпсэттилэр. Өрөспүүбүлүкэ өрүстэригэр, ордук Амма, Бүлүү умнаһыгар уу таһыма түстэҕинэ таһаҕаһы флот хайдах тиэрдиэн сөбүгэр болҕомтолорун уурдулар.
edersaas.ru
Ол курдук, муус ааһар кэмигэр устар аалларга куттал суоһаабатын хааччыйыахтара. Итиэннэ быйылгы навигация саҕаланарыгар оттугу, ГСМ, тутуу матырыйаалларын, аһы-үөлү тустаах бөһүөлэккэ, улууска тиэрдэргэ хантараах түһэрсэн, эрдэ бэлэмниэхтэрэ.
«Быйылгы навигацияҕа Сахабыт сирин өрүстэринэн уопсайа 3 мөлүйүөн туонна таһаҕаһы, ол иһигэр 1,28 мөлүйүөн туонна нэһилиэнньэ олоҕун-дьаһаҕын хааччыйар табаары тиксэриэхтээхпит. Арктическай навигация дуогабардара үгэс быһыытынан, бэс ыйын саҥатыгар оҥоһуллуохтара. Уу суолунан таһаҕаһы тиэйии сыл ахсын тус-туһунан уратылардаах. Флот сырыыта уу таһымыттан улахан тутулуктаах. Ыам ыйын 4 күнүгэр Өлүөнэ үөһээ тардыытыгар Уус Кутка навигация номнуо саҕаланан, табаар тиэллэн турар. Онон муус бардаҕына бастакы таһаҕас кэлиэ. Айылҕаны кэтээн көрөөччүлэр быйыл Аммаҕа уу таһыма үрдүк буолуо диэн сабаҕалыыллар эрээри, кэм кэрдии көрдөрүө. Бүлүү ГЭС каскаада сөптөөх ууну ыытан, суудуналар сырыылара тохтуо суоҕа диэн эрэнэбит. Өрөспүүбүлүкэҕэ тыын суолталаах тэрээһин араас ыарахаттары аахсыбакка кэмигэр уонна толору оҥоһулларын ситиһиэхтээхпит», — диэн бастакы вице-премьер Алексей Колодезников бэлиэтээтэ.
Оттон таһаҕаһы тиэйээччилэр, өрүс флотун үлэһиттэрэ быйылгы навигацияҕа бэлэмнэрин биллэрдилэр.
Марианна Тыртыкова, «Саха сирэ», edersaas.ru