Быйыл Саха АССР төрүттэммитэ 100 сылын бэлиэтээһин улахан бэлитиичэскэй уонна духуобунай түгэнинэн буолуоҕа.
Үбүлүөй чэрчитинэн былааннанар култуурунай тэрээһиннэргэ өрөспүүбүлүкэ култууратын тэрилтэлэрэ бары кыттыахтара.
Ону таһынан өрөспүүбүлүкэ улуустарыгар култуура эбийиэктэрэ үлэҕэ киллэриллэллэрэ былааннанар.
СӨ култуураҕа уонна духуобунай сайдыыга миниистирэ Юрий Куприянов бэйэтин отчуотугар быйылгы сылга былааннанар кэккэ бэлиэ түгэннэри билиһиннэрдэ:
Өрөспүүбүлүкэ олохтоохторо САССР тэриллибитэ 100 сылын култуурунай бырагыраамаларын, Арассыыйа норуоттарын култуурунай нэһилиэстибэлэрин сылын тэрээһиннэрин, өрөспүүбүлүкэҕэ Ийэ сылын бэлиэтээһин, Үөһээ Бүлүү улууһугар «Олоҥхо Ыһыаҕа -– Хотун Бүлүү туонатыгар» Ыһыах, Олоҥхо сиригэр ЮНЕСКО уһулуччу үчүгэй айымньыларын көрсүһүүлэрин туоһуларынан буолуохтара.
«Култуура» национальнай бырайыак дьаһалларын олоххо киллэрии чэрчитинэн, Бүлүү улууһун Тааһаҕар уонна Сунтаар улууһун Кэмпэндээйи сэлиэнньэлэригэр Культуура дьиэтин, Бүлүү улууһун Тыымпы сэлиэнньэтигэр элбэх хайысхалаах Култуура киинин, Мэҥэ Хаҥалас улууһун Аллараа Бэстээх бөһүөлэгэр Култуура сайдар киинин тутуу, ону сэргэ кулууптары олохтоохтук өрөмүөннээһин, модельнай бибилэтиэкэлэри тэрийии былааннаналлар.
Быйыл өр күүтүллүбүт Ньурбатааҕы көһө сылдьар дыраама тыйаатырын дьиэтэ, Намҥа Култуура уонна духуобунай сайдыы дыбарыаһа, Эдьигээҥҥэ Этно-култуурунай киин, Таатта улууһун Чөркөөх сэлиэнньэтигэр Култуура дьиэтэ аһыллаллара өрөспүүбүлүкэ бүттүүнүн үөрүүтүнэн буолуоҕа.
Саха сиригэр киинэ балысханнык сайдыытын салҕыы өйөөн, «Саха Өрөспүүбүлүкэтигэр кинематографияны судаарыстыба өйөөһүнүн туһунан» өрөспүүбүлүкэ сокуона ылыллара күүтүллэр.
Надежда ЕГОРОВА, «Саха сирэ», edersaas.ru