«2020-2024 сылларга Саха Өрөспүүбүлүкэтин научнай- тэхиньиичэскэй сайдыыта» судаарыстыбыннай бырагыраама бырайыагын СӨ Бырабыыталыстыбатын Бэрэссэдээтэлин э.т. Андрей Тарасенко салайааччылаах сүбэ мунньахха көрдүлэр.
edersaas.ru
Андрей Тарасенко эрэгийиэн инфраструктуратын саҥардыыга, сир баайын хостооһуҥҥа, диверсификациялааһыҥҥа уонна экэниэмикэ аныгылыы сайдарыгар саҥа ньымалары киллэрэргэ дойду уонна өрөспүүбүлүкэ салалтата туруорбут далааһыннаах соругун толорорго, биир сүрүннэринэн Саха сирин научнай-тэхиньиичэскэй сайдыыта буоларын бэлиэтээтэ.
«Биһиги сүрүннүүр научнай кииннэрбит өрөспүүбүлүкэҕэ оҥоһуллар улахан инфраструктурнай бырайыактарга кыттыахтаахтар. Итиннэ холобурунан Өлүөнэ өрүһү туоруур муоста, судоверфь тутуута уонна саҥа суудуналары оҥорон таһаарыы буолуон сөп. Ити сыалы ситиһэргэ чопчу соруктар бааллар, онон кэскиллээх хайысхаларга үбү-харчыны угарга бэлэммит. Наука институттарыгар туһаайан, эһиги этиилэргитин, толкуйдаргытын күүтэбит», — диэтэ Андрей Тарасенко.
СӨ Наукаларын академиятын бэрэсидьиэнэ Василий Филиппов наукаҕа билии күүһэ туруоруллубут баараҕай суолталаах бырайыактары быһаарар кыахтааҕын эттэ.
Мунньах түмүгүнэн, Саха сирин Наукаларын академията кыттыылаах холбоһуктаах Учуонай сэбиэт тэрийэргэ быһаарыы ылылынна. Манна наука сайдыытын кэскиллээх хайысхаларын, судаарыстыба, биисинэс, наука кииннэрэ хардарыта сибээстээх үлэлээһиннэрин ымпыгар-чымпыгар тиийэ үөрэтиэхтэрэ. Сэбиэт түмүгүнэн судаарыстыбыннай бырагырааманы ситэриэхтэрэ-хоторуохтара.
Егор Карпов, «Саха сирэ» хаһыат, edersaas.ru