Бүлүүгэ от ыйын 14-16 күннэригэр «ТАБЫС» диэн култуурунай-үөрэтэр сыаллаах ыччат өрөспүүбүлүкэтээҕи бэстибээлэ буолуоҕа. Бэстибээл үөрэх, успуорт уонна култуура хайысхалардаах ыытыллыаҕа.
Быйылгы бэстибээл Саха АССР тэриллибитэ 100 сылыгар, Саха сиригэр Ийэ сыла, Арассыыйаҕа норуоттар култуурунай үгэстэрин сылыгар ананыаҕа. «Табыска» улуустар, куораттар, уопсастыбаннай тэриллиилэр 18-35 саастаах ыччаттан турар хамаандалара кыттыахтара.
Бэстибээл өрөспүүбүлүкэ судаарыстыбаннай уонна бэйэни салайыныы уорганнара ыччат бэрэстэбиитэллэрин, уопсастыбаннай тэриллиилэри, субкултууралары кытта үлэлэрин күүһүрдэр, уопут атастаһар, сибээс олохтуур сыаллаах ыытыллар.
«Табыс» кэмигэр хас даҕаны куонкурус ыытыллара былааннанар: «Эдэр ыал», «Эдэрдэр бириэмийэлэрэ», успуорт национальнай көрүҥнэригэр хамаанданан күрэхтэһии, военизированнай эстафета, эдэр модельердар уонна дизайнердар куонкурустара, ВИА, театрализованнай туруорууга куонкурустар уо.д.а.